Të gjitha modelet kompjuterike për parashikim të motit japin shanse të larta që sot pasdite në Kosovë të ketë zhvillime të fuqishme konvektive. Këto zhvillime konvektive pritet të rezultojnë me shtrëngata të fuqishme lokale dhe rrebeshe intensive shiu me vetëtima dhe bubullimë.
Zhvillimet më të fuqishme pritet të nisin gjatë orëve të pasdites dhe normalisht edhe kësaj radhe nuk priten reshje në tërë territorin.
Ka gjasa që vende-vende të ketë shira të rrëmbyeshëm të përcjellura me vetëtima dhe bubullimë masive, erëra të fuqishme dhe breshër, por të gjitha këto procese të mundshme atmosferike nuk pritet të zgjasin shumë, ngase nga orët e vona të pasdites ose mbrëmjes pritet që atmosfera të fillojë të qetësohet dhe stabilizohet gradualisht.
Rrebeshe dhe shtrëngata të fuqishme sot priten edhe në Maqedoninë Veriore, Kosoven Lindore, veriun e Malit të Zi dhe shumë vise të Shqipërisë. Të gjitha këto zhvillime pritet të jenë të karakterit lokal.
Në kohën e rrebeshe të shiut priten ulje të ndjeshme të temperaturave në zonat e reshjeve, ndërsa vala e nxehtësisë do të vazhdojë deri të dielën.
Të premtën na pret mot kryesisht me diell dhe shansa të pakta për ndonjë zhvillim të ndonjë rrebeshi.
Rrebeshet me bubullima kthehen të shtunën pasdite pas një dite shumë të nxehtë, por vetëm në disa rajone.
Të dielën na pret mot shumë i këndshëm, me temperatura të këndshme, intervale kohore me diell, vranësira dhe ndonjë rigë ose rrebeshe lokal shiu./MeteoBallkan
