Si pasojë e shirave të dendur të orëve të fundit, situata në qarkun e Shkodrës paraqitet problematike, me disa banesa që rrezikojnë të përmbyten.
Kryeministri Rama, me anë të një postimi në Facebook, shkruan se mbi 100 efektivë nga Forca Tokësore dhe Baza e Mbështetjes për Emergjencat Civile janë nisur drejt Shkodrës për t’u ardhur në ndihmë personave në nevojë.
“Mbi 100 efektivë nga Forca Tokësore dhe Baza e Mbështetjes për Emergjencat Civile, mjete të larta, mjete lundrimi dhe pajisje të posaçme për situata përmbytje po i shtohen skuadrës së efektivëve në Shkodër për të shtuar forcën dhe shpejtësinë e reagimit në çdo situatë problematike që reshjet mund të sjellin gjatë natës e në vijim”, shkruan Rama.
