Temperaturat polare tanimë gjendet thellë në lindje të Evropës, ndërsa në rajonin tonë po depërtojnë masa më të ngrohta ajrore nga Evropa dhe Mesdheu.
Reshje atmosferike nuk pritet të kemi këto ditë, ngase do të jemi nën ndikimin e masave të fuqishme, të thata anticiklonike. Nga nesër (e enjte) do të fillojnë të fryjnë erëra nga jugu dhe jugperëndimi dhe për këtë arsye temperaturat do të shënojnë rritje, ndërsa vazhdojnë ngricat gjatë orëve të vonshme të natës dhe orëve të hershme të mëngjesit.
Temperaturat maksimale nga nesër do të arrijnë mbi 10 gradë Celsius në shumë rajone kontinentale të Kosovës dhe rajonit, ndërsa mbi 15 gradë Celsius në rajonet mesdhetare.
Të premtën në Kosovë na pret mot me intervale kohore me diell dhe vranësira lokale. Pritet një fuqizim i përkohshëm i erërave jugperëndimore, por në përgjithësi moti do të jetë i këndshëm dhe stabil. Temperaturat maksimale pritet të lëvizin nga 10 deri në 13 ose 14 gradë Celsius.
Mot i ngjashëm na pret edhe gjatë fundjavës, ndërsa fillimi i javës së re do të karakterizohet nga një front i cili sjellë reshje kalimtare dhe ulje të përkohshme të temperaturave./MeteoBallkan