Ende jemi nën ndikimin e masave mjaft të ngrohta ajrore që vijnë si rezultat i rrymimeve të forta ajrore nga jugu dhe jugperëndimi, ndërsa të enjten presim fuqizim të mëtutjeshëm të erërave jugperëndimore sidomos në orët e mesdites dhe pasdite kur priten erëra të forta, por asgjë e pazakonshme.
Të entjen ose nesër mund të kemi riga ose rrebeshe afatshkurtra lokale në disa rajone, por të premten priten reshje shiu dhe rrebeshe në gati tërë rajonin. Lokalisht priten rrebeshe mjaft intensive sidomos në Shqipëri ku mund të ketë problematika afatshkurtra. Reshje shiu priten edhe në Kosovë.
Të shtunën do të kemi ndryshim të madh në lëvizjen e rrymimeve ajrore për shkak të ardhjes së frontit të ftohtë ajror nga veriu. Pritet të kemi erëra kalimthi të fuqishme nga veriu dhe verilindja si dhe ulje të temperaturave.
Fronti do të shoqërohet me erëra dhe reshje shiu e në viset kodrinore-malore edhe reshje bore. Ka gjasa që në Kosovë të ketë fjolla bore edhe në disa zona më të ulëta mbidetare.
Pas kalimit të frontit një anticiklon i fuqishëm stabilizon atmosferën dhe të dielën do të kemi mot stabil, por dukshëm më i ftohtë dhe me mundësi për acar në mëngjes.
Në Shqipëri pas një të premteje me reshje të shumta dhe intensive për fundjavë pritet mot paksa më i ftohtë, por me reshje të pakta lokale e me intervale kohore me diell./Meteoballkan
