Sonte i themi lamtumirë muajit Mars dhe i shprehim mirëseardhje muajit të pranverës së vërtetë dhe ringjalljes së natyrës, megjithatë dimri do të vijë në shprehje pikërisht në fillim të muajit Prill.
Reshjet dhe rrebeshet lokale të shiut do të fillojnë gjatë natës në disa lokacione të Kosovës, Malit të Zi dhe veriut të Shqipërisë.
Nesër në Kosovë pritet të kemi me intervale kohore me diell dhe vranësira. Vranësirat do të zhvillohen duke sjellur reshje lokale shiu dhe po ashtu edhe mundësi për rrebeshe lokale me vetëtima dhe bubullimë. Reshjet do të jenë të karakterit lokal, por në disa lokacione priten rrebeshe intensive sidomos në veri të vendit. Nuk do të mungojnë periudhat pa reshje.
Reshje lokale shiu dhe rrebeshe lokale me ndonjë bubullimë nesër priten edhe në Shqipëri, Maqedoninë Veriore, Mal të Zi dhe Kosovën lindore, megjithatë reshjet do të jenë të karakterit lokal.
E diela na sjellë mot më stabil, me intervale kohore me diell, por edhe vranësira e rrebeshe të izoluara shiu me ndonjë vetëtimë dhe bubullimë.
Të hënën na vijnë vranësira të dendura dhe reshje shiu në tërë rajonin. Në mbrëmje dhe gjatë natës në Kosovë priten reshje të dendura bore të cilat mund të krijojnë edhe shtresa bore.
Nga e marta ftohtë dhe me reshje të herëpashershme lokale bore./METEOBALLKAN
