Masa mjaft të fuqishme ciklonike kanë përfshirë rajonin tonë këtë fillim-jave duke kushtëzuar reshje shiu e me uljen e temperaturave kanë filluar reshjet e borës. Masat e ftohta ajrore me origjinë polare po depërtojnë në rajon dhe do të mbesin disa ditë.
Gjatë kësaj jave na pret mot i paqëndrueshëm dhe i ftohtë. Reshjet e borës do të jenë të pranishme edhe ditën e martë, ndërsa nga e mërkura parashihet që reshjet të rrallohen, megjithatë ende do të ketë gjasa për reshje lokale, sporadike në disa vise ku priten riga shiu e fjolla bore në zonat kodrinore-malore.
Në përgjithësi nga e mërkura pritet mot më i qetë, por mbesin masat e ftohta polare. Për këtë arsye rajoni rrezikohet nga acari gjatë natës dhe orëve të hershme të mëngjesit. Intensiteti acarit do të varët tërësisht nga kthjellimi eventual i motit gjatë natës dhe orëve të hershme të mëngjesit. Nëse do ketë kthjellime acari do të jetë më i fortë, por nëse mbesin vranësirat atëherë acari do të jetë shumë më i butë. Sipas parashikimeve parashihet të ketë kthjellim të pjesshëm një ose dy netë mas së mërkurës dhe është e pamundur nga tani të dihet saktësisht se cilat rajone rrezikojnë më shumë. Ne do ta përcjellim gjendjen gjatë javës dhe do të mundohemi tu informojmë me kohë.
Afër fundjavës rikthehen vranësirat dhe reshjet lokale. Ka gjasa që edhe njëherë të kemi reshje bore në disa ultësira të Kosovës.
Bazuar sipas ecurive aktuale sinoptike javën tjetër do të kemi mot paksa më stabil dhe pak më të ngrohtë, por ende mbetet freskët për këtë periudhë kohore.
Pra, një javë e ftohtë e me reshje bore, nga mesi i javës reshje shumë më të rralla, ndërsa reshjet e shiut e në disa vise edhe borës rikthehen afër fundjavës ose në fundjavë.
Për çdo ndryshim eventual në parashikim dhe për acarin eventual gjatë kësaj jave do të njoftoheni me kohë në postimet tona të përditshme./METEOBALLKAN
