Në Adriatikun verior kemi ciklonin e fuqishëm i cili po përparon drejt Luginës së Panonisë. Fronti i fuqishëm në kuadër të këtij cikloni vjen paraditen e së premtes në Shqipëri dhe Kosovë duke kushtëzuar reshje dhe rrebeshe shiu. Reshjet lokalisht do të jenë të dendura, por nuk do të zgjasin shumë.
Pas kalimit të frontit në orët e mesdites ose masdites priten kthjelime të pjeshshme ose intervale kohore me diell dhe reshje do të ketë vetëm në disa zona. Temperaturat shënojnë ulje, por jo aq të theksuara. Reshje bore mund të ketë vetëm në malet ose bjeshkët më të larta.
Në anën tjetër që nga Iberia, përmes Evropes perëndimore e veriperëndimore e deri në Skandinavi dhe Rusi do të kemi zhvillime të masave të fuqishme anticiklonike që do të përbëjnë bllokadë për lëvizjen e masave ajrore.
Për këtë arsye masat ajrore ciklonike do të bllokohen në Evropen juglindore dhe rajonin tonë dhe si pasojë do të kemi mot mjaft të ndryshueshëm dhe të freskët gjatë ditëve të fundjavës dhe në fillim të javës së re.
Reshjet do të jenë të herëpashershme dhe nuk do të mungojnë edhe intervalet kohore me diell të cilat rrisin temperaturat përkohësisht, ndërsa në kohën e vranësirave dhe rrebesheve të shiut do të jetë mjaft freskët.
Pra, pas kalimit të frontit të së premtës që do të kushtëzojë reshje kalimtare dhe erëra lokalisht të fuqishme pritet të kemi mot mjaft të ndryshueshëm me alternime mes vranësira, intervaleve kohore me diell dhe rrebeshe të shiut./Meteoballkan