Mot i ndryshueshëm në rajonin tonë për Festën e Punëtorëve, megjithatë në Kosovë parashihet moti më i këndshëm dhe stabil, me intervale të gjata kohore me diell. Sidoqoftë, parashihen edhe vranësira e mundësi për ndonjë rigë ose rrebesh të izoluar shiu. Intervale të gjata kohore me diell priten edhe në verilindje të Maqedonisë së Veriut dhe Kosoven lindore, ndërsa në perëndim të Maqedonisë së Veriut priten më shumë vranësira dhe herë pas here riga shiu.
Në Shqipëri më shumë vranësira sidomos në jug dhe perëndim të vendit ku parashihen edhe reshje të herëpashershme shiu. Edhe në vise tjera vranësirat arrijnë pasdite dhe në mbrëmje me mundësi për ndonjë rrebesh afatshkurtër shiu. Vranësira dhe riga shiu parashihen edhe në Mal të Zi, ndërsa paradite do të ketë intervale kohore me diell.
Në përgjithësi në tërë rajonin paradite do të jetë moti më i mirë, ndërsa pasdite dhe në mbrëmje do të ketë përkeqësime lokale sidomos në Shqipëri, perëndim të Maqedonisë së Veriut dhe Mal të Zi.
Temperaturat do të jenë rreth vlerave normale për këtë periudhë kohore, përkundër vranësirave do të jetë relativisht ngrohtë. Në tërë rajonin parashihen temperaturat maksimale rreth 20 gradë Celsius, ndërsa në shumë edhe mbi 20 gradë Celsius.
Do të fryjnë erëra të lehta deri mesatare nga juglindje në Kosovë dhe Maqedoninë Veriore e nga jugu në Shqipëri dhe Mal të Zi./METEOBALLKAN
