Orëve të pasdites dhe mbrëmjes në Kosovë pritet të kemi destabilizim të fuqishëm të atmosferës. Priten zhvillime të fuqishme të vranësirave duke përfshirë edhe ato konvektive që do të kushtëzojnë reshje shiu e rrebeshe lokale me vetëtima dhe bubullimë. Vende-vende mund të ketë rrebeshe mjaft intensive, erëra kalimthi të fuqishme dhe breshër.
Rrebeshe sot priten në Kosovë dhe disa vise të Shqipërisë e Maqedonisë së Veriut, ndërsa nga nesër rrebeshe lokalisht të fuqishme priten në tërë rajonin duke përfshirë Shqipërinë, Maqedoninë Veriore, Malin e Zi dhe Kosovën lindore. Po ashtu do të kemi edhe ulje të temperaturave dhe pastaj reshje lokale shiu që në disa vise në Kosovë do të jenë tipike vjeshtore sidomos të premtën dhe të shtunën, përderisa në Shqipëri dhe Maqedoninë Veriore vazhdojnë rrebeshet dhe stuhitë lokale me bubullima.
Nga e diela do të kemi përmirësim gradual të motit, por ende do të jetë mjaft freskët, ndërsa nga e hëna temperaturat do të fillojnë të rriten por gradualisht. Rritje më rapide e temperaturave do të kenë viset mesdhetare, ndërsa viset kontinentale rritja e temperaturave do të jetë më graduale. Nga mesi i javës temperatura verore do të përfshijnë tërë rajonin./METEOBALLKAN
