Fronti i ftohtë goditi furishëm dje dhe mbrëmë shtetet fqinje veriore, por u dobësua dhe humbi vetitë duke u afruar drejtë territoreve tona. Ky front shkaktoi stuhi të fuqishme që nga Sllovenia, pjesë të Kroacisë, Bosnjës dhe Hercegovinës dhe Serbisë ku pati breshër masiv dhe dëme materiale.
U krijuan edhe disa stuhi “superqelizore” që kanë potencial edhe për tornado.
Mbetjet e frontit sot arrijnë në Kosovë dhe do të ketë disa zhvillime të vranësirave që eventualisht mund të kushtëzojnë ndonjë rrebesh ose stuhi kalimtare të izoluar, por shumica absolute e Kosovës mbetet pa reshje, ndërsa për Shqipërinë dhe Maqedoninë Veriore as mos të flasim ngase atje mbetet gjendja krejtësisht stabile.
Fronti të paktën shkakton ulje të lehta të temperaturave në viset kontinentale dhe ndoshta një lehtësim të nxehtësisë së padurueshme, megjithatë ajri afrikan mbetet prezent.
Sot (e premte) dhe nesër (e shtunë) në disa vise kontinentale mund të ndjehet ky lehtësim sadopak, ndërsa të dielën na pret përsëri nxehtësi e madhe dhe intensifikim i sërishëm i valës së fuqishme të nxehtësisë verore./METEOBALLKAN
