Nxehtësia verore do të jetë karakteristikë kryesore e motit gjatë kësaj jave në Kosovë, Shqipëri dhe më gjerë bë Ballkan.
Kosova pritet të përshkohet nga mot mjaft i nxehtë veror, me freskime afatshkurtra vetëm në disa rajone. Gjatë tërë javës pritet mot i kthjellët, por priten edhe vranësira dhe ndonjë rrebesh i izoluar shiu me vetëtima dhe bubullimë. Java fillon mjaft i nxehtë dhe përfundon mjaft e nxehtë. Rrebeshe të izoluara priten të martën, të mërkurën dhe të enjten. Rrebeshet do të jenë të papërfillshme dhe do të kapin vetëm disa rajone duke shkaktuar freski afatshkurtër. Përndryshe, vapa verore vazhdon me intensitete të ndryshme gjatë tërë javës. Temperatura maksimale pritet të arrijë deri në 39 gradë Celsius e ndoshta edhe 40.
Shqipëria gjatë tërë javës po ashtu pritet të përshkohet nga mot i kthjellët dhe shumë i nxehtë me temperatura maksimale që do të arrijnë afërsisht deri në 43 gradë Celsius. Vetëm në disa zona malore mund të ketë ndonjë rrebesh të izoluar ndonjë ditë të javës.
Edhe Maqedonia Veriore dhe Mali i Zi do të kenë një javë shumë të nxehtë verore me temperatura maksimale pak mbi 40 gradë Celsius. Disa vise kodrinore-malore mund të freskohen ndonjë ditë nga ndonjë rrebesh shiu. Ngjashëm do të jetë edhe në Kosovën lindore.
Më gjerë në rajon po ashtu pritet vapë e madhe verore, por frontet e Atlanikut do të arrijnë të kapin territoret e Serbisë dhe Sllovenisë, pjesërisht edhe Kroacisë dhe Bosnjës dhe Hercegovinës ku gjatë javës nganjëherë priten stuhi të fuqishme me vetëtima e bubullima masive dhe breshër. Këto fronte nuk do të arrijnë te ne ose mund të arrijnë shumë të dobësuara
Ishte ky parashikimi javor i motit me disa fjale, ndërsa për çdo ndryshim eventual dhe për shkak të vapës së madhe do të mundohemi të jemi sa më aktiv./METEOBALLKAN