Një front krejtësisht i dobët, i ftohtë ajror do të kalojë sot në Kosovë duke kushtëzuar disa vranësira dhe ndonjë rrebesh krejtësisht të izoluar shiu. Fronti do të ndjehet pak më shumë në viset kodrinore-malore dhe në Rrafshin e Kosovës, ndërsa në Dukagjin shumë më pak.
Temperaturat shënojnë ulje krejtësisht të lehta, por mbetet shumë nxehtë dhe kujdesi duhet të jetë në nivele të larta sidomos për personat e moshuar dhe fëmijët që mos ekspozohen në diell orëve të mesdites dhe pasdites.
Në shumicën absolute të territorit të Kosovës nuk priten reshje fare dhe lum ato rajone që eventualisht mund të flladiten sadopak sidomos nga erërat e freskëta veriore. Në rajon më gjerë vazhdon mot shumë i nxehtë dhe me diell.
Pra, ky front i dobët nuk do të ndikojë aq në atmosferë mbi Kosovë dhe rajone, përpos uljes së temperaturave prej 2, 3 e 4 gradëve më pak nga vlerat e ditës së djeshme, prandaj mos pritni ndonjë freski të madhe ose ndonjë ndryshime të motit. Nga nesër përsëri më nxehtë dhe me rritje të sërishme të temperaturave. Pasditeve vonë do të ketë gjasa për ndonjë rrebesh të izoluar shiu me ndonjë bubullimë./METEOBALLKAN
