Masat ajrore stabile anticiklonike po mbretërojnë në territoret tona për shumë ditë me radhë, duke penguar frontet e Atlantikut të depërtojnë më në jug. Frontet e Atlantikut po shkaktojnë stuhi shumë të fuqishme në Ballkanin verior, veriperëndimor dhe pjesë të Ballkanit perëndimor.
Në territoret tona po vazhdon mbretërimi i ajrit shumë të nxehtë që vjen nga Mesdheu e origjinen e ka në Afriken veriore.
Edhe e shtuna do të jetë shumë e nxehtë, ndërsa të dielën në Kosovë dhe disa rajone kontinentale do të ketë freskim sadopak të motit dhe do të mund të marrim më lirshëm frymë. Ka gjasa edhe për ndonjë stuhi të izoluar shiu me vetëtima dhe bubullimë.
Kulminacioni i nxehtësisë afrikane parashihet të vije në fillim të javës së re, më saktësisht të martën dhe të mërkurën. Këto dy ditë do të kemi fuqizimin e kreshtës termike nga jugperëndimi dhe fuqizim të erërave jugore dhe jugperëndimore. Përpos nxehtësisë diellore do të kemi edhe erëra me efektin “fen” që do të shkaktojnë rritje të mëtutjeshme të temperaturave. Në Kosovë mund të preket shifra 40, ndërsa në Shqipëri afër 43 ose 44 gradë Celsius.
Lajmi i mirë është se të enjten do të kemi freskim të motit dhe depërtim të masave më të freskëta nga veriu e veriperëndimi që eventualisht do të ti jap fund kësaj vale të fortë nxehtësie të paktën përkohësisht. Freskimi i motit do të ndjehet shumë më shumë në Kosovë dhe disa vise kontinentale të territoreve tona, por edhe në zonat mesdhetare do të ketë ulje të lehta të temperaturave, por vala e nxehtësisë nuk do të ndërprehet sidomos në Shqipëri dhe disa zona mesdhetare të territoreve tona.
