Pasdite sot dhe sonte do të kemi destabilizim edhe më të fuqishëm të atmosferës edhe ashtu të destabilizuar dhe priten zhvillime më të fuqishme të vranësirave të shiut duke përfshirë edhe ato konvektive që do të kushtëzojnë rrebeshe lokalisht intensive shiu me vetëtima dhe bubullimë.
Reshjet e mëdha do të jenë të karakterit lokal siç ndodhë zakonisht në zhvillimet vertikale apo konvektive, por vranësira të shpeshta do të mbesin prezente edhe dy ditët e ardhshme duke gjeneruar reshje shiu edhe në zonat ku eventualisht mungojnë reshjet e shiut.
Siç mund të vërejmë nga fotografia kryesore (me ngjyrë portokalli) shumë zona që nga Evropa perëndimore e qendrore, Italia dhe Ballkani do të jemi nën ndikimin e kësaj mase mjaft jo-stabile ajrore që do të kushtëzojë rrebeshe intensive të karakterit lokal.
Mot me vranësira të shpeshta dhe reshje të herëpashershme shiu do të mbajë edhe të Premten dhe të Shtunën, fatmirësisht të dielën parashihet të kemi përmirësim të kushteve të motit dhe kjo mund të ndikojë shumë pozitivisht veçanërisht në kultivimin e bletarisë për të cilën rrezet e diellit këto ditë janë jashtëzakonisht të rëndësishme./MeteoBallkan
