Nesër në Kosovë do të mbajë mot me vranësira por edhe me ndonjë interval kohor me diell. Do të kemi erëra kalimtare nga ana e veriut. Në disa rajone ka mundësi që të ketë riga të dobëta dhe afatshkurtëra shiu dhe bore.
Në Shqipëri, Mal të Zi dhe Maqedoni nesër mot relativisht i nxehtë për këtë periudhë kohore. Do të ketë vranësira kalimtare dhe intervale kohore të gjata me diell. Reshje atmosferike nuk pritet të ketë.
Të dielën do të afrohet fronti i parë serioz i ftohtë ajror në kuadër të shumë fronteve që pritet të kemi në rajonin tonë ditëve të ardhshme. Në Kosovë gjatë natës do të fillojnë reshjet e borës. Reshjet nuk pritet të jenë intensive, gjithashtu do të kemi edhe fuqizimin e erërave veriore. E kemi fjalën nga e diela natën në të hënën. Ditën e hënë në tërë rajonin tonë do të mbajë mot i vranët dhe kohë pas kohe me reshje bore si dhe me erëra të ftohta veriore. Reshjet të herëpashershme bore pritet të ketë në Kosovë, Maqedoni, Mal të Zi si dhe në Shqipërinë veriore, lindore dhe juglindore. Nuk përjashtohet mundësia që fjolla bore të ketë edhe në vise tjera të Shqipërisë kodrinore-malore me përjashtim të viseve bregdetare.
Ditët e para të Janarit do të vazhdojnë të na sjellin mot të ftohtë dhe me reshje të herëpashershme bore. Për intensitetin e këtyre reshjeve nuk mund të themi ende asgjë sepse kemi ende kontradikta të mëdha në modele. Një është e sigurtë se do të kemi depërtimin e fuqishëm të masave ajrore të ftohta me oirgjinë polare dhe erëra të fuqishme dhe të ftohta veriore, për këtë nuk ka dyshim, por variacionet janë tek sasia e reshjeve të borës dhe për këtë duhet pritur edhe pak./Meteoballkan.
