Kjo javë filloi e nxehtë dhe me temperatura të larta, por në Shqipëri dhe Maqedoninë Veriore pati shtim të konsiderueshëm të vranësirave dhe rrebeshe lokale shiu, vende-vende të fuqishme. Këto reshje dhe vranësira “zbutën” sadopak nxehtësinë intensive. Vranësira pati edhe në Kosovë, por rrebeshet ishin më të izoluara.
Java vazhdon e nxehtë, por me rënie graduale të temperaturave dhe me shtim të vranësirave.
E Marta pritet të jetë një ditë kryesisht stabile dhe me zhvillime të pakta të vranësirave të shiut,. Zhvillime më të fuqishme priten në Mal të Zi, thellë në veri të Shqipërisë dhe aty-këtu në veri dhe perëndim të Republikës së Kosovës. Vende-vende mund të ketë ndonjë stuhi të fuqishme, të izoluar. Në viset tjera parashihen zhvillime më të pakta.
Masa ajrore jo-stabile parashihet të fuqizohet në Kosovë dhe rajon prapë nga e mërkura. Përpos intervaleve kohore me diell do të shpeshtohen vranësirat dhe zhvillimet e tyre vertikale. Temperaturat do të shënojnë ulje, por jo shumë të theksuar. Vende-vende priten zhvillime të fuqishme të vranësirave të dendura dhe rrebeshe lokalisht intensive shiu me vetëtima, bubullimë dhe breshër. Nuk priten reshje në tërësinë e territoreve tona, sepse ende reshjet dhe zhvillimet do të jenë kryesisht të karakterit lokal.
Temperaturat maksimale do të vazhdojnë të jenë afër shifres 30 gradë Celsius. Në mesjavë mund të ulen pak nën 30 gradë Celsius, por në fundjavë ato prapë rriten pak mbi 30. E kemi fjalën për Kosovë, sepse në Shqipëri dhe Maqedoninë Veriore temperaturat maksimale konstant do të jenë mbi 30 gradë Celsius, përpos rasteve kur kemi ndonjë stuhi çasti.
Fundjava sjellë stabilitet atmosferik dhe rritje të temperaturave sidomos dita e diel, ngase të shtunën do të ketë zhvillime të izoluara.
Pra, edhe një javë e nxehtë kur nuk ka reshje (reshjet sjellin freski kalimtare) -(pak më e freskët sidomos në Kosovë). Përpos diellit priten rrebeshe lokalisht intensive shiu me vetëtima, bubullimë dhe breshër (E Mërkurë, E Enjte, E Premte). E Diela sjellë stabilizim të plotë të motit.
Ishte ky parashikimi javor i motit me pak fjalë. Ndryshime të vogla gjithsesi se mund të ketë. Për çdo ndryshim eventual do të njoftoheni në postimet tona të përditshme në Meteo Ballkan. /MeteoBallkan
