Mijëra njerëz janë evakuuar nga shtëpitë e tyre në rajonin Costa del Sol të Spanjës jugore, pasi u dha një alarm i kuq i motit për shira ekstremë dhe përmbytje.
Agjencia e Mbrojtjes Civile e Spanjës dërgoi një alarm masiv në telefonat e qytetarëve në provincën Málaga të martën në mbrëmje, duke paralajmëruar për një “rrezik ekstrem të reshjeve”.
Zona, duke përfshirë resortet turistike Marbella, Velez dhe Estepona, pritet të marrë peshën e madhe të fenomenit ekstrem të motit të njohur si “Dana”.
Disa rajone të tjera në Spanjë mbeten në gatishmëri pasi fronti i ri i motit pritet të sjellë shira të rrëmbyeshëm dhe temperatura të ulëta vetëm disa javë pasi vendi u shkatërrua nga përmbytjet që kanë vrarë deri më tani më shumë se 220 njerëz.
Katalonja në veri-lindje të Spanjës, veçanërisht bregdeti pranë Tarragona, është vendosur gjithashtu në alarm të kuq deri të mërkurën në mbrëmje.
Shkollat në të gjithë provincën jugore të Málaga janë mbyllur ndërsa shumë supermarkete kanë vendosur grilat.
Rreth 3,000 njerëzve që jetojnë në afërsi të lumit Guadalhorce u është thënë të largohen nga shtëpitë e tyre, ka thënë qeveria rajonale e Andaluzisë.
Ministri i Presidencës së qeverisë rajonale Antonio Sanz tha: “Ne nuk kemi evakuuar qytete të tëra, por zona specifike të lidhura me bregun e lumit.
“Ky vendim i është komunikuar qeverisë së Spanjës për të marrë bashkëpunim nga forcat dhe organet e sigurisë shtetërore”.
Agjencia meteorologjike e Spanjës Aemet ka vendosur pjesë të rajoneve të Valencias dhe Andaluzisë, si dhe Ishujt Balearik, në alarm portokalli nga tani deri të enjten.
Aemet paralajmëron për reshje shiu dhe stuhi që mund të jenë “shumë të forta deri të rrëmbyeshme”.
Shirat e dendur shkaktuan përmbytje në Siçili
Shirat e dendur shkaktuan përmbytje sot në afërsi të qytetit të Katanias në Siçili. Në qytetin e vogël Tore Arkirafi, uji ka vërshuar rrugët dhe ka tërhequr makinat në det, raporton Ansa. Vendasit dërguan më shumë se 30 kërkesa për ndihmë në shërbimet e urgjencës.
Zjarrfikësit shpëtuan një numër drejtuesish të bllokuar në makinat e tyre dhe nuk ka raportime për persona të zhdukur. Italia është përballur me valë të shumta të motit ekstrem këtë vit për shkak të ndryshimeve klimatike.
Valët e të nxehtit intensive dhe thatësirat ekstreme goditën jugun e vendit këtë verë, veçanërisht Sicilinë dhe Sardenjen, ndërsa reshjet e mëdha çuan në përmbytje në rajonet Piemonte, Emilia-Romagna dhe Marche.
🚨 Here we are again, sadly
Catania, Sicily – Italy 🇮🇹
This morning, floodedpic.twitter.com/zIOIIb7PBu
— Mambo Italiano (@mamboitaliano__) November 13, 2024
