Java e kaluar ishte shumë e nxehtë dhe patëm rastin të përjetojmë valën e parë të nxehtësisë tropikale, ndërsa në disa zona kjo valë nxehtësie është ndërprerë sot sepse temperaturat nuk do të shkojnë deri në 30 gradë Celsius, por vala e nxehtësisë nuk do të ndërpritet në shumë zona të Shqipërisë sidomos në perëndim të vendit ku temperatura maksimale do të jetë çdo ditë 30 ose ndonjë shkallë më lartë.
Kjo javë në të cilën kemi hyrë do të karakterizohet me stabilitet atmosferik dhe me thatësi. Sipas parashikimeve më të reja zona të fuqishme ajrore anticiklonike do të ndikojnë në motin gjatë gati tërë kësaj jave dhe me këtë nënkuptojmë mot kryesisht të kthjellët dhe pa reshje atmosferike, megjithatë masa paksa më të freskëta ajrore depërtojnë shpeshherë nga veriu i Kontinentit duke ulur temperaturat dhe duke mos lejuar një vapë ekstreme në viset tona.
Në viset bregdetare dhe mesdhetare të Shqipërisë gjatë tërë javës pritet mot me diell, stabil dhe mjaft i nxehtë veror, ndërsa masa paksa më të freskëta do të mbrëtërojnë në viset kontinentale sidomos në Rrafshin e Kosovës dhe disa zona tjera kontinentale të territoreve tona.
Për shkak të afërsisë së zonave të freskëta ajrore nga veriu dhe lindja dhe masave të nxehta nga jugu e perëndimi në disa vise kodrinore-malore gjatë javës do të ketë kushte për zhvillime konvektive apo vertikale me mundësinë e zhvillimit të disa stuhive të izoluara të shiut me vetëtima dhe bubullimë. Këto stuhi mund të zhvillohen orëve të pasdite kryesisht në juglindje të Shqipërisë dhe perëndim të Maqedonisë së Veriut dhe zonat afër. Më shumë probabilitet për ndonjë rrebesh shiu do të kenë viset kodrinore-malore. Në viset tjera gjasat për ndonjë zhvillim gjatë kësaj jave do të jenë më të pakta. Vetëm nëse ndodhe ndonjë “ndryshim i papritur” në sinoptikë, atëherë mund të kemi ndonjë ndryshim në parashikim.
Pra, e tërë java me kushte të qëndrueshme atmosferike. Nganjëherë priten zhvillime të stuhive të izoluara në disa zona kodrinore-malore orëve të pasdites apo mbrëmjes, por nuk pritet vapë e madhe përpos disa zonave në Shqipëri. Temperaturat do të fillojnë të rriten menjëherë edhe në zonat e nxehta në Maqedoninë Veriore.
Gjatë tërë javë më nxehtë do të jetë në Dukagjin e më freskët në Rrafshin e Kosovës për shkak të erërave të freskëta nga veriu që freskojnë shumë vise në Rrafshin e Kosovës.
Pra, një javë me stabilitet atmosferik dhe pa vapë ekstreme për shumë zona. Vetëm perëndimi i Shqipërisë do të jetë shumë i nxehtë./MeteoBallkan
