Njerëzimi ka dështuar që të kufizojë ngrohjen globale për 1.5 shkallë Celsius dhe duhet menjëherë të ndryshojë qasjen, ka alarmuar Sekretari i përgjithshëm i OKB-së, raporton britanikja “The Guardian”.
Në intervistën e tij para samitit të ardhshëm, të ndryshimit klimatik COP30, Antonio Guterres e ka pranuar se është e pashmangshme se njerëzimi nuk do të arrijë ta përmbushë cakun e Marrëveshjes së Parisit për Klimën, duke paralajmëruar “pasoja shkatërruese” për botën
.Ai u ka bërë thirrje liderëve të cilët do të mblidhen në qytetin pyjor brazilian Belem që ta kuptojnë se më nuk mund të shtyjnë kufizimin e emetimeve, sepse kjo mund të ketë pasoja të pashlyeshme në Amazonë, Arktik dhe oqeane.“Le ta pranojmë dështimin tonë”, ka deklaruar për “The Guardianin” dhe mediumin me bazë në Amazonë “Sumauma”.
“E vërteta është se ne kemi dështuar të shmangim cakun prej 1.5 shkallë Celsius në vitet ardhshme. Dhe ai 1.5 Celsius do të ketë pasoja shkatërrimtare”, ka deklaruar ai.
Ai ka bërë thirrje që menjëherë të ndryshohet qasja me qëllim që pasojat të jenë sa më të vogla të mundshme.
Plani ynë ka shënuar në dhjetë vitet e fundit temperaturat më të larta në histori. Pavarësisht alarmit shkencor për shpejtësinë me të cilën po ngrohet bota prej djegies së fosileve – naftës, gazit dhe qymyrit – Sekretari i përgjithshëm i OKB-së ka thënë se qeveritë kanë dështuar që t’i zbatojnë zotimet që i kishin marrë përsipër.
