Kjo fundjavë po karakterizohet me mot pranveror edhe pse kemi hyrë tani zyrtarisht në muajin nëntor dhe temperaturat janë ndjeshëm mbi vlerat mesatare. Po ashtu edhe rrezet diellore janë të forta pothuajse sikur në mes të pranverës.
Kjo ka ndikuar në rritjen e ndjeshme të temperaturave ndërsa vazhdojnë rrymimet e ngrohta ajrore nga jugu.
Njëkohësisht nga Atlantiku kemi depërtimin e masave jo-stabile ajrore, me vranësira e reshje shiu me sistem frontal që po përshkon Evropën dhe pritet të vijë edhe te ne, megjithatë deri të hënën në viset tona do të kemi mot shumë të mirë dhe stabil.
Edhe dita e diele do të jetë mjaft e ngrohtë, me diell dhe shtim lokal të vranësirave. Të Hënën pritet të kemi ndryshim të motit me shtim masiv të vranësirave.
Fillimisht vranësirat do të dendësohen në Mal të Zi dhe pjesë të Shqipërisë. Në Kosovë edhe paraditen e së hënës pritet mot mjaft i ngrohtë dhe me intervale me diell, ndërsa pasdite ose në mbrëmje dendësim i vranësirave me reshje shiu e lokalisht mund të ketë edhe rrebeshe shiu me vetëtima dhe bubullimë.
Gjatë natës në të martën në mëngjes do të depërtojë edhe fronti i ftohtë ajror me reshje shiu, erëra veriore dhe ulje të temperaturave. Kalimi i sistemit frontal do të kushtëzojë shkurtimisht përpos reshjeve edhe erëra të forta, megjithatë asgjë shqetësuese dhe e gjitha kalon shpejt.
Pra, shfrytëzoni këtë fundjavë me mot jashtëzakonisht të mirë dhe stabil. Të hënën ndryshim i motit, pak më herët në Shqipëri, pastaj vonë edhe në Kosovës për shkak të ardhjes së sistemit frontal me origjinë nga Atlantiku.
Ky sistem do të jetë kalimtar dhe të martën pas shiut do të kemi përmirësim të motit. Kjo të paktën sipas ecurive aktuale sinoptike nëse nuk ka ndonjë ndryshim të papritur. Pas sistemit dhe reshjeve do të kemi edhe disa ditë me mot stabil dhe rritje të temperaturave, por kjo mbetet të shihet nga evoluimi i gjendjes sinoptike pas sistemit frontal të së hënës mbrëma./MeteoBallkan
