Të Premten në Kosovë na pret mot plotësisht i vranët dhe shpeshherë me reshje shiu. Reshjet e shiut do të jenë të intensitetit kryesisht mesatar e në disa zona mund të jenë disa intervale me reshje të dendura, kurse zona tjera me reshje më të dobëta. Reshjet e shiut mund të zgjasin tërë ditën madje edhe në mbrëmje dhe natën e ardhshme me ndërprerje të shkurtra në disa rajone.
Temperaturat pritet të lëvizin nga 5 minimalja deri në 11 gradë Celsius ajo maksimale.
Edhe në Shqipëri pritet të mbajë mot kryesisht i vranët dhe paradite me reshje të pakta lokale, kurse pasdite vonë pritet që reshje e rrebeshe të reja shiu të përfshijnë tërë vendin.
Reshje të shpeshta shiu nesër priten edhe në Maqedoninë Veriore, Luginë të Preshevës dhe Mal të Zi, ndërsa në jug të Maqedonisë së Veriut pritet të ketë reshje të dendura shiu.
Rrebeshe të fuqishme shiu të Premten priten në Greqi ku vende-vende parashihet të ketë përmbytje.
Reshjet e shiut do fillojnë të dobësohen dhe vende-vende edhe do të ndërpriten të Shtunën në Kosovë dhe shumë pjesë të Shqipërisë, ndërkohë që vazhdojnë në pjesën më të madhe të Maqedonisë së Veriut. Pasdite vonë dhe në mbrëmje reshjet ndalen në tërë rajonin. Gjatë kësaj vale të reshjeve borë do të ketë vetëm në malet më të larta. Temperaturat do të pësojnë ulje të përkohshme.
E diela vjen me vranësira e mundësi për intervale kohore me diell, ndërkohë që reshje të pakta parashihen vetëm në disa rajone të izoluara./MeteoBallkan
