Temperaturat e ulëta që mbizotëruan ditëve të kaluara të Dhjetorit ishin si pasojë e inverzionit të temperaturave dhe mjegullnajave dhe jo e masave të ftohta polare, ndërsa tani kemi fillimin e depërtimit të masave më të ftohta ajrore në të gjitha shtresat e atmosferës.
Erërat e ftohta që kanë filluar tani janë fillim i depërtimit të këtyre temperaturave më të ftohta që vijnë nga verilindja e Kontinentit dhe këto vinë së bashku me reshjet e borës që parashihen afërsisht deri mesditen apo pasditen e së Enjtes.
Në viset kodrinore-malore do të krijohen shtresa dhe po ashtu edhe në disa ultësira të Rrafshit të Kosovës. Disa ultësira të Dukagjinit mund të kalojnë vetëm me reshje shiu.
Sidoqoftë, pas kalimit të kësaj “turbullire” do të pasojë kthjellimi i pjesshëm i motit, por temperaturat mbesin të ulëta sepse rrymimet ajrore nga veriu do të jenë me ne edhe shumë ditë. Për momentin nuk pritet asgjë esktreme dhe të gjitha janë në suaza të normales për këtë periudhë kohore.
Një tjetër masë e ftohtë ajrore pritet të arrijë të Dielën-hënën dhe do të ndjehet sidomos në Kosovë me erëra të ftohta nga veriu dhe reshje sporadike bore kryesisht në viset kodrinore-malore dhe këto ditë rajoni ynë do të jetë “arenë lufte” mes anticikloni gjigand me qendër në Britaninë e Madhe dhe cikloneve të fuqishme në veri dhe lindje të Evropes. Acari do të jetë i fuqishëm sidomos gjatë natës dhe mëngjesit.
Është shumë interesante gjendja sinoptike gjatë ditës së fundit të këtij vitit dhe ditëve të para të vitit 2026 sepse do të kemi një tjetër masë të fuqishme të ftohtë ajrore që do të depërtojë në pjesë të Evropës dhe rajonit tonë, por kjo ka ende shumë hapësirë për diskutime.
Ka shumë gjasa që Mesdheu të reagojë me ciklogjeneza të fuqishme me reshje bore në viset tona dhe ky do të ishte version me dimër të fuqishëm, megjithatë ka disa gjasa që i ftohti polar të jetë i thatë dhe me pak reshje bore. Versioni i tretë është që ciklogjenezat të jenë kogja larg viseve tona dhe të aktivizojnë erërat e ngrohta jugore me reshje fillimisht shiu në viset tona, prandaj është ende shumë diskutabile se çfarë në të vërtetë na pret në fillimet e vitit 2026.
Një dimër dukshëm më aktiv na pret në fillim të Janarit, por nga tani çdo përpjekje për parashikim të saktë është mjaft problematik duke pas para sysh kaosin në atmosferë (e përshkuar nga modelet më të njohura globale kompjuterike për parashikim të motit) nga gjendja sinoptike që pamundëson parashikim preciz nga tani.
Edhe pak ditë gjendja do të qartësohet tërësisht dhe ne do të jemi këtu për sqarimin e saktë të ecurive sinoptike./MeteoBallkan
