Nesër në Kosovë pritet të mbajë mot me vranësira, reshje të pakta lokale shiu e bore dhe mundësi për intervale kohore me diell sidomos pasdite.
Temperaturat do të fillojnë të pësojnë ulje sidomos pasdite dhe në mbrëmje sepse do të fillojnë të fryjnë erëra më të ftohta nga verilindja të cilat lajmërojnë për reshje bore të dielën. Maksimalja pritet rreth 8 gradë Celsius dhe atë në Dukagjin.
Në Shqipëri nesër pritet të mbajë mot me intervale kohore me diell dhe vranësira lokale. Në mbrëmje nga jugu dhe lindja shtim i vranësirave për shkak të afrimit të ciklonit më të ri.
Intervale kohore me diell nesër pritet edhe në Maqedoninë Veriore, por në mbrëmje vonë shtim i vranësirave sikurse edhe në Luginë të Preshevës.
Të dielën na pret mot plotësisht i vranët dhe ndjeshëm më i ftohtë. Do të fillojnë reshje shiu të cilat shumë shpejt do të shndërrohen në borë në shumë pjesë të Republikës së Kosovës, disa pjesë të Maqedonisë së Veriut po ashtu dhe juglindja, lindja dhe veriu i Shqipërisë. Në të gjitha këto rajone do të ketë reshje bore. Në Kosovë bora do të zbresë edhe në ultësira duke krijuar shtresa simbolike vende-vende. Temperaturat do të shënojnë ulje të ndjeshme në të gjithë rajonin, por pa ndonjë të ftohtë të madh.
Dita e hënë vjen kryesisht e vranët dhe e ftohtë, në mëngjes lokalisht ende me reshje bore. Reshjet pritet të ndërpriten gjatë ditës ose paradite./MeteoBallkan
