Cikloni i fuqishëm i cili tashmë po shkakton stuhi bore e shiu që nga Sllovenia deri në Mal të Zi, gjatë orëve të vonshme do të përfshijë edhe Malin e Zi dhe Shqipërinë dhe pastaj edhe Kosovën dhe Maqedoninë Veriore.
Gjatë natës në Kosovë përpos shiut parashihen edhe reshje të përziera me shqote e borë edhe në disa ultësira të Rrafshit të Kosovës sepse temperaturat polare do të miksohen së bashku me frontin e fuqishëm të ftohtë ajror, megjithatë reshjet e borës nuk parashihet të zgjasin shumë në zonat e ulëta të Rrafshit të Kosovës për dallim nga viset malore ku priten reshje më të shpeshta bore.
Në tërë Kosovë do të fillojnë reshje shiu të cilat në disa momente mund të jenë të dendura dhe pastaj në zona të caktuara përpos viseve kodrinore-malore do të përzihen me shqote dhe borë.
Reshje të dendura priten edhe Shqipëri, Mal të Zi dhe në fund edhe në Maqedoninë Veriore. Temperaturat do të shënojnë ulje në nivel rajoni. Vende-vende priten stuhi me vetëtima e bubullimë.
Pas një periudhe të gjatë thatësie më në fund po arrijnë reshjet e shumëpritura atmosferike, por të cilat me vehte mbartin rrezikun e ngricave të vonshme që mund të shkaktojnë disa dëme në vegjetacion dhe kultura tjera të hershme bujqësore. Kjo do të varet nga nuanca të vogla për shembull nëse do të kemi kthjellime gjatë natës dhe orëve të hershme të mëngjesit, por shpresat janë se vranësirat do të mbesin për një kohë të gjatë duke penguar ngricat. Pra, për momentin shanset janë rreth 50 për qind dhe nuk mund të përcaktohet me saktësi shumë të lartë nëse do të kemi ngrica apo mund të shpëtojmë pa ngrica të mëdha.
Rreziku më i madh për ngrica mbetet në fillim të Prillit dhe kemi një shenjë të mirë se nga data afër 5 Prill masa më të ngrohta ajrore nga Mesdheu mund të depërtojnë duke shpëtuar vegjetacionin e hershëm, por kjo ende mbetet vetëm një sinjal që përkrahet nga modeli ECMWF. Modelet tjera japin acar dhe vazhdimin e depërtimit të ajrit të ftohtë polar. Meqenëse kjo mbetet ende enigmatike duhet të presim edhe ndonjë ditë dhe të shohim se në çfarë drejtimi po shkon gjendja sinoptike në fillim të Prillit.
Pra, pas një kohe të gjatë pa reshje, reshjet po vinë dhe këto reshje do jenë shumë të mirëseardhura.
Përndryshe stuhi dimërore priten sonte në shumë pjesë të Ballkanit she ato kanë filluar në Slloveni, Kroaci dhe Bosnjë e Hercegovinë. Në viset kodrinore-malore priten reshje të dendura bore, madje edhe në disa ultësira të Bosnjës dhe Kroacisë do të ketë shtresa bore.
Për evoluimin e gjendjes sinoptike na përcillni në postimet e radhës./MeteoBallkan
