Gjatë kësaj jave parashihet që atmosfera të jetë me mot të ndryshueshëm, me intervale të shpeshta kohore me diell dhe vranësira të shpeshta lokale dhe po ashtu edhe me reshje të herëpashershme atmosferike.
Java do të jetë tipike pranverore, jo shumë e ngrohtë, por as shumë e ftohtë. Temperaturat do të jenë rreth vlerave mesatare, por ndonjë ditë ato do të jenë pak nën vlerat mesatare për këtë periudhë kohore.
Reshjet atmosferike do të jenë aktive pothuajse gjatë tërë javës, por jo në të gjitha zonat Reshjet do të jenë të shpërndara në zona të caktuara, pra të karakterit lokal.
E Hëna ishte një ditë stabile me diell dhe vranësira lokale. Temperaturat u rritën krahasuar me ditën e zymtë paraprake.
Të Martën do të ketë shtim të vranësirave në shumë rajone dhe po ashtu do të ketë gjasa për reshje lokale shiu. Nëse shikojmë më larg në rajon reshjet do të jenë më të shumta në pjesët kontinentale të Shqipërisë, Maqedonisë së Veriut dhe veri të Malit të Zi. Reshje lokale priten edhe në Kosovë (sidomos në jug të Kosovës), por ato do të jenë më të pakta dhe nuk do të kapin tërë territorin. Temperaturat do të shënojnë edhe njëherë ulje të përkohshme, por jo shumë të theksuara. Reshje më të dendura priten në viset malore e në Shqipëri rrebeshe me bubullima.
Të mërkurën dhe të enjten temperaturat do të shënojnë rritje të ndjeshme sidomos në Shqipëri, por edhe në viset tjera. Priten më shumë rreze diellore dhe më pak reshje atmosferike. Erërat e freskëta veriore e verilindore do të jenë të pranishme. Reshjet do të jenë simbolike. Të enjten pasdite në disa zona priten zhvillime konvektive me ndonjë rrebesh lokal shiu me vetëtima dhe bubullimë kryesisht në pjesë të Maqedonisë së Veriut dhe Shqipërisë.
Të Premten përsëri do të ketë shtim të vranësirave dhe rrebeshe lokale shiu. Në Shqipëri dhe Maqedoni priten stuhi lokale me bubullima. Edhe të Shtunën parashihet të mbajë mot jo-stabil me vranësira, intervale kohore me diell dhe rrebeshe lokale shiu të shoqëruara me vetëtima dhe bubullimë.
Sipas ecurive aktuale sinoptike e Diela do të jetë më stabile dhe pak më e ngrohtë, por prapë me mundësi për reshje të izoluara.
Pra, një javë me mot të ndryshueshëm, me reshje paksa më të theksuara të martën, të premten dhe të shtunën. Ditët tjera më shumë diell e shumë më pak reshje edhe pse pothuajse çdo ditë mund të ketë gjasa për reshje të izoluara.
Temperaturat shënojnë rritje nga e mërkura dhe pësojnë ulje të premten, por nuk priten oscilime apo ndryshime shumë të mëdha të temperaturave. Ndryshime në parashikim mund të ketë dhe për çdo ndryshim eventual do të njoftoheni në postimet tona të përditshme./MeteoBallkan
