Meteorologët kanë paralajmëruar banorët e Gjermanisë se pjesa më e vështirë ende nuk ka ardhur, por pasojat e motit të rëndë tashmë janë ndjerë.
Siç shkruan Fenix Magazin, në një aksident të rëndë trafiku në Bruchsal, në veri të Karlsruhes, kanë humbur jetën dy persona.
Sipas të dhënave jozyrtare të policisë, reshjet e dendura kanë krijuar një shtresë të trashë uji në rrugë, duke bërë që automjeti të humbasë plotësisht kontrollin, të rrëshqasë në korsinë tjetër dhe të përplaset me një veturë që po vinte nga drejtimi i kundërt. Në vendin e ngjarjes është angazhuar edhe një helikopter shpëtimi, ndërsa kanë ndërhyrë ekipe të shumta zjarrfikësish dhe shpëtimi.
Përveç këtij aksidenti, janë regjistruar edhe incidente të tjera, përfshirë goditje nga rrufeja. Konkretisht, rrufeja goditi Kishën e Shën Palit në Osnabrück gjatë një stuhie. Fatmirësisht, askush nuk u lëndua.
Po ashtu, në qytetin Melle, rrufeja goditi çatinë e një shtëpie familjare dhe shkaktoi zjarr. Dëmet materiale vlerësohen në rreth 50 mijë euro, ndërsa banorët arritën të evakuohen në kohë.
Alarmet e kuqe meteorologjike janë aktivizuar për pjesë të Bavarisë, Baden-Württembergut, Hessenit, Saksonisë së Poshtme dhe Rajnës Veriore-Vestfalisë. Meteorologët kanë paralajmëruar qytetarët për rrezikun nga rrëzimi i pemëve, dëmtimet në rrjetin energjetik, rrugët dhe bodrumet e përmbytura.
