Pas përmirësimit afatshkurtër të kushteve të motit dita e Premte pritet të kushtëzojë një përkeqësim drastik të motit sidomos në aspektin termik duke ulur temperaturat ndjeshëm nën vlerat mesatare për këtë periudhë kohore.
Një front i fuqishëm, i ftohtë ajror do të kushtëzojë përkeqësim dhe destabilizim të motit dhe reshjet lokale mund të nisin që nga orët e hershme të mëngjesit në pjesë të Republikës së Kosovës. Përpos frontit të ftohtë në Mesdhe jo larg Detit Jon do të krijohet edhe një ciklon i cekët i cili do të favorizojë stuhi të fuqishme shiu e breshër në Greqi.
Stuhi lokale nesër priten në shumë pjesë të Shqipërisë dhe jugperëndim të Maqedonisë së Veriut. Nuk përjashtohet mundësia që edhe në disa pjesë të Kosovës të ketë ndonjë vetëtimë dhe bubullimë, por temperaturat mjaft të ulëta mund të mos favorizojnë konveksionet (zhvillimet forta vertikale) e fuqishme në Kosovë dhe kjo mund të jetë një lajm i mirë.
Kjo verë po vazhdon të jetë mjaft dinamike në aspektin e reshjeve dhe jo-stabiliteve atmosferike, kurse Gushti do të na sigurojë shumë ditë të nxehta dhe stabile verore, megjithatë edhe gjatë Gushtit parashihen kalime të fronteve të ftohta dhe zhvillime konvektive edhe pse më të rralla në bazë të parashikimeve të tanishme të cilat mund të ndryshojnë.
Pra, gjatë ditës së ardhshme në Kosovë ulje e ndjeshme e temperaturave, shtim i konsiderueshëm i vranësirave dhe reshje e rrebeshe lokale shiu të cilat në intervale jo të gjata mund të jenë mesatare deri të dendura. Do të fryjnë erëra mjaft të freskëta nga veriu.
Në Shqipëri po ashtu ulje e temperaturave dhe stuhi lokale shiu me vetëtima dhe bubullimë. Edhe në Maqedoninë Veriore vende-vende priten stuhi me bubullima, por stuhitë më të fuqishme dhe më intensive pritet të ndodhin në Greqi. Në apsketin termik temperaturat do të ulen më së shumti në Republikën e Kosovës.
Fronti i ftohtë do të kalojë dhe cikloni po ashtu do të kalojë shumë shpejt në drejtim të Greqisë eë Turqisë dhe e shtuna sjellë stabilizim dhe qetësim të motit edhe pse mbetet realtivisht freskët. Të dielën na pret mot më i nxehtë, me erëra nga jugperëndimi dhe mundësi për rrebeshe lokale apo të izoluara orëve të vonshme, ndërkohë që një tjetër sistem masiv vranësirash me rrebeshe intensive shiu pritet të përfshijë të hënën si Shqipërinë po ashtu edhe Kosovës./MeteoBallkan
