Edhe një javë tipike verore para nesh edhe pse jemi në fund të dekadës së parë të muajit Shtator.
Temperaturat në të gjitha viset tona do të vazhdojnë të jenë mjaft të larta për këtë periudhë kohore, përkundër mundësisë së shfaqjes së jo-stabiliteteve lokale.
Fillimi i javës tërësisht i kthjellët në të gjitha viset dhe mjaft i nxehtë. Ngjashëm do të jetë edhe dita e dytë e javës, megjithatë vranësirat lokale do të fillojnë të shfaqen edhe pse të dobëta dhe të izoluara.
Temperaturat do të ngriten edhe më shumë të martën në Kosovë e rajon, por disa vranësira lokale do të fillojnë të shfaqen në pjesë të Shqipërisë do të mund të ketë edhe ndonjë rrebesh të izoluar shiu me ndonjë vetëtimë dhe bubullimë. Pjesa më e madhe e Shqipërisë do të mbetet ende pa asnjë shanse për reshje, kurse Kosova do të jetë e kthjellët e pa reshje të martën.
Të mërkurën gjërat do të fillojnë të ndryshojnë në rajone të ndryshme por jo në nivel të të gjitha viseve. Përkundër nxehtësisë gjithnjë e më shumë vranësira lokale do të fillojnë të shfaqen dhe po ashtu do të mund të zhvillohen dhe gjenerojnë rrebeshe të izoluara shiu me vetëtima dhe bubullimë. Stabilitetit të plotë atmosferik po i vije fundi.
Vende/vende të mërkurën mund të krijohen kushte për ndonjë shtrëngatë të fortë shiu me bubullima por të gjitha mbesin zhvillime të karakterit lokal.
Përderisa në Slloveni e Kroaci priten reshje të dendura shiu e ulje të ndjeshme të temperaturave këtë mesjavë në viset tona do të vazhdojnë temperaturat mjaft të larta verore me zhvillime të izoluara sepse sistemet e fuqishme dhe të përhapura të reshjeve do të mbesin të bllokuara në Itali e Adriatikun verior dhe kjo është arsyeja që në viset tona do të ketë vazhdim të vapës sepse sistemet nuk do të përparojnë aq lehtë, prandaj do të kemi tejzgjatje të kushteve verore në viset tona edhe këtë javë.
Zbehje graduale e të nxehtit afrikan
Me afrimin e fundjavës do të vazhdojnë temperaturat e larta, por njëkohësisht do të kemi afrimin e reshjeve të cilat ende nuk do të kapin të gjitha viset tona, por do të vijnë apo zhvillohen në zona më të përhapura.
Fundjava me mundësinë e depërtimit pak më masiv të reshjeve, por kjo mbetet ende situatë për tu ndjekur dhe vlerësuar.
Gjithsesi gjatë fundjavës presim destabilizim pak më intensiv, por a do të jetë vetëm në zona të izoluara apo do të jetë më i përhapur mbetet të shihet evoluimi i gjendjes sinoptike.
Pra, dhe një javë tipike verore, me shumë diell e vapë e me pak vranësira. Por, nga e mërkura do të ketë gjithnjë e më shumë vranësira lokale e stuhi të izoluara apo lokale. Përkundër kësaj vazhdojnë temperaturat e larta verore. Fundjava ka hapësirë për diskutime gjatë javës.
Gjendja e rëndë nga deficiti i reshjeve dhe temperaturat e larta vazhdon të jetë e rënduar edhe gjatë kësaj jave. Edhe pse reshjet do të fillojnë të shfaqen, por ende jo në sasinë dhe kohëzgjatjen e nevojshme. Reshjet ende do të jenë në formë të rrebeshe lokale me bubullima dhe disa zona mund të ketë përmirësim të gjendjes hidrologjike, por jo të gjitha viset do të përfitojnë. Për fundjavë mund të kemi reshje në të gjitha viset, megjithatë kjo ende nuk është e sigurtë./MeteoBallkan
