Një valë stuhish goditi një pjesë të madhe të Italisë veriore të mërkurën, duke sjellë një rënie të temperaturave dhe duke i dhënë një fund të menjëhershëm një vere të shënuar nga nxehtësia rekord.
Stuhi të fuqishme me rrufe mbërritën edhe në Slloveni, ndërsa moti i keq ka përfshirë tashmë edhe një pjesë të Kroacisë.
Në disa pjesë të Sllovenisë ra edhe breshër.
Gjatë mëngjesit moti i keq përfshiu Adriatikun verior, Gorski Kotarin, dhe do të zgjerohet edhe në Kroacinë qendrore. Në lindjen e largët dhe në jug do të mbetet kryesisht e thatë. Vetëm nga fundi i ditës dhe gjatë natës erërat do të kthehen nga veriu, si pasojë e së cilës do të ketë freskim, shkruan N1.
Erë e fortë në Slloveni
Stuhitë përfshinë pjesën perëndimore të Sllovenisë dhe paralajmëruan ndryshimin e situatës meteorologjike. Era fryu më së forti përgjatë detit, ku goditjet e erës arritën rreth 50 km/h. Në zonat e larta malore, në stacionin meteorologjik Kanin u mat një goditje prej 103 km/h.
Gjatë mëngjesit stuhi të reja përfshinë Slloveninë perëndimore, e më pas u zhvendosën drejt brendësisë së vendit dhe rreth orës 12 përfshinë edhe kryeqytetin, Ljubljanën.
Rrezikun kryesor do ta përbëjnë prá goditjet e forta të erës, për këtë arsye Agjencia e Republikës së Sllovenisë për Mjedisin ka lëshuar një paralajmërim portokalli për motin. Rrebeshe të izoluara dhe stuhi me rrufe do të krijohen edhe në pjesë të tjera të Sllovenisë, transmeton N1.
Nga Ljubljana vjen edhe një video dramatike që tregon rënien e një dege e cila për pak sa nuk goditi kalimtarët e rastit.
