Shoqata e Peshkatarëve Sportivë Rekreativë “Krapi” në Prishtinë ka reaguar lidhur me ngordhjen e tre peshqve në Liqenin e Badocit më 19.09.2026, duke thënë se bëhet fjalë për një ngjarje të natyrshme dhe se nuk ka pasur raste të tjera të ngordhjes së peshqve.
Sipas kësaj shoqate, peshqit e ngordhur mund të kenë qenë mbi 50 vjeç, duke u bazuar në pretendimin se ky lloj peshku ishte lëshuar në Liqenin e Badocit gjatë viteve ’70.“
SHPK ‘Krapi’ – Prishtinë sqaron se nuk mund të jetë shqetësim ngordhja e tre peshqve më 19.09.2026. Mbi të gjitha vlerësimet, shoqata ‘Krapi’ ka konstatuar se ngordhja e këtij lloji të peshkut është e natyrshme, me arsyetimin këta peshq mund të jenë mbi 50 vjeç.”- thuhet në reagim.
Shoqata ka thënë se këta peshq, sipas saj, janë lëshuar në liqen në vitet ’70 dhe se prej atëherë nuk kanë pasur zhvillim të mëtejshëm, pasi kushtet e liqenit nuk i janë përshtatur këtij lloji.“…në vitet e ’70-ta këta peshq janë lëshuar në Liqenin e Badovcit dhe që nga ajo kohë nuk kanë pasur zhvillim të mëtutjeshëm, pasi vendi nuk i është përshtatur këtij lloji, por ata thjesht kanë vazhduar të jetojnë të tillë në liqen.” – thuhet në reagim.
Shoqata “Krapi” ka deklaruar se ka monitoruar liqenin gjatë ditës dhe natës dhe se pas rastit të 19 shtatorit nuk është konstatuar ngordhje e peshqve të tjerë.
Ndërkohë, lidhur me shqetësimet e ngritura për cilësinë e ujit në Badoc ka reaguar edhe KRU “Prishtina”.KRU “Prishtina” më 21.09.2026 ka thënë se, bazuar në analizat e realizuara, uji nga Badoci është i pijshëm dhe i përshtatshëm për konsum njerëzor.
“Bazuar në analizat e realizuara, uji nga Badoci është i pijshëm dhe i përshtatshëm për konsum njerëzor (si në ujin e trajtuar po ashtu edhe në ujin e patrajtuar në liqe).”- thuhet në njoftimin e KRU “Prishtina”.KRU “Prishtina” ka bërë të ditur se analizat fiziko-kimike dhe bakteriologjike të ujit kryhen rregullisht nga laboratori i akredituar i kompanisë, me qëllim të monitorimit të cilësisë së ujit.
“Analizat fiziko-kimike dhe bakteriologjike të ujit realizohen në mënyrë të rregullt nga laboratori i akredituar i KRU ‘Prishtina’, me qëllim të monitorimit të vazhdueshëm të cilësisë së ujit dhe garantimit të sigurisë për konsumatorët.”- thuhet në njoftim.Sipas KRU “Prishtina”, analizat e ujit të patrajtuar dhe ujit të trajtuar të kryera më 21.09.2026 kanë rezultuar brenda standardeve për ujë të pijshëm.“Analizat fiziko-kimike të ujit patrajtuar (Aeratorit) dhe ujit të trajtuar të datës 21.09.2026 janë brenda standardit për ujë të pijshëm.”- thuhet në njoftim.
