Shqipëria mund të shkojë drejt modelit grek për të ndihmuar qytetarët të përballojnë efektet e krizës së çmimeve.
Në fillim të muajit, Greqia arriti dakordësinë me supermarketet për uljen e çmimeve për mbi 1 mijë e 600 produkte, kryesisht të shportës bazë të konsumit.
“Ne do të shkojmë në atë drejtim. Kur të kristalizohet lista e produkteve, në bisedim me furnitorët dhe marketet, kemi në plan të nisim një bisedë për përcaktimin e disa produkteve, për të konkretizuar një skemë të ngjashme me Greqinë.”, tha Enkelejd Musabelliu, zv.ministër i Ekonomisë dhe Inovacionit, raporton A2CNN.
Pikënisje do të jetë “Pasqyra e Çmimeve”, e cila, sipas qeverisë, synon të ofrojë transparencë më të madhe mbi çmimet që ofrojnë bizneset në treg.
Në portal, qytetarët mund të informohen për një sërë produktesh, si vendase ashtu edhe të importuara. Shpresa është që bizneset të hyjnë në konkurrencë dhe, përmes saj, të ulin çmimet.
“Ne kemi qenë të shqetësuar për nivelin e çmimeve që në fillim të vitit. Ndonëse inflacioni nuk është në nivele shqetësuese, disa çmime kanë mbetur të larta. Ndërkohë, në dy vitet e fundit kemi parë zhvlerësim të monedhës europiane, çka praktikisht i bën importet më të lira, por ky fenomen nuk është reflektuar te çmimi përfundimtar.”
Në platformë është parashikuar që të tregohet çmimi që në burim, nga prodhimi deri në shitje për produktet vendase, ndërsa për produktet e importuara, nga dogana deri në treg.
Fillimisht, skema do të nisë me produktet e shportës.
“Jemi në bisedime me supermarketet e mëdha që kanë shtrirje në të gjitha qytetet. Po kërkojmë të përcaktojmë cilat janë produktet ushqimore më të shitura, si prodhime vendase ashtu edhe të importuara, në mënyrë që të ofrojmë transparencë mbi çmimin.
Hapi i dytë do të jetë një analizë e marzheve të fitimit bruto dhe neto. Kjo analizë do të na mundësojë të kuptojmë pse çmimi përfundimtar është i lartë dhe, mbi këtë bazë, ne do të ndërmarrim politikat e duhura që do të ndikojnë në zbutjen e situatës.”
Rritja e çmimeve ka rikthyer në vëmendje nevojën për masa mbështetëse për familjet dhe shtresat në nevojë.
Rikthimi nga qeveria i Bordit të Transparencës për karburantet është një tjetër tregues i presioneve që po shfaqen në treg.
