Pas shirave lokal që ranë këtë të Premte, gjatë mëngjesit dhe ditës së shtunën shirat do të vazhdojnë të jenë prezente të karakterit lokal, por do të vinë duke humbur intensitetin e tyre në mënyrë graduale.
Gjatë ditës moti do të ketë tendencë stabilizimi gradual dhe parashihen edhe intervale kohore me diell, ndërkohë që temperaturat do të fillojnë të rriten.
Minimalja pritet të zbres deri në 7 gradë Celsius e maksimalja do të arrijë deri në 19 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi nesër pritet të mbajë mot me vranësira e intervale kohore me diell. Më shumë kohë me diell do të ketë në perëndim të rajonit sidomos në Shqipëri e më shumë vranësira e ende ndonjë reshje lokale do të ketë më në lindje. Reshje priten veçanërisht në pjesë të Maqedonisë së Veriut dhe Greqisë. Gjatë ditës ose pasdite në përgjithësi pritet stabilizim në tërë rajonin, përpos Greqisë ku pritet destabilizim.
Të dielën na pret mot ende paksa i ndryshueshëm me alternime mes vranësirave e intervaleve kohore me diell. Ende në disa rajone mund të ketë reshje kryesisht të dobëta dhe afatshkurtra shiu. Në viset bregdetare dhe në përgjithësi në Shqipëri priten më shumë kthjellime po nuk do të jetë shumë nxehtë.
Temperaturat në rritje graduale në të gjitha viset, por nuk pritet më ndonjë nxehtësi ekstreme./MeteoBallkan
