Rreth 50 milionë qytetarë në Evropë rrezikojnë të mos jenë në gjendje të ngrohin në mënyrë të mjaftueshme banesat e tyre gjatë këtij dimri, për shkak të rritjes së çmimeve të energjisë. Paralajmërimi është dhënë nga Komisioneri Evropian për Energjinë dhe Strehimin, Dan Jorgensen, i cili ka folur për një dimër të vështirë dhe ka ngritur shqetësimin se numri i familjeve të prekura mund të rritet më tej.
“Një dimër i vështirë na pret”, deklaroi Jorgensen në Luksemburg, përpara mbledhjes së Këshillit të Energjisë, ndërsa kriza energjetike po intensifikohet edhe përpara fillimit të sezonit të ftohtë. Presioni po ndihet në të gjithë tregjet evropiane, ku çmimet e energjisë elektrike kanë arritur nivele të larta. Në Greqi, çmimi me shumicë është ngjitur në 287 euro për megavat-orë, duke shënuar rritjen më të madhe që prej fillimit të krizës në pranverë. Situata paraqitet edhe më e rënduar në disa vende të tjera. Në Bullgari, çmimi ka arritur në 302.47 euro për megavat-orë, në Hungari në 306.23 euro, në Gjermani në 268 euro dhe në Francë në 247 euro.
Athina kërkon ndërhyrje të koordinuar evropiane
Përballë përkeqësimit të situatës, Greqia ka kërkuar një përgjigje të përbashkët nga Bashkimi Evropian. Ministri i Mjedisit dhe Energjisë, Stavros Papastavrou, e cilësoi situatën si një krizë të paprecedentë dhe kërkoi shfrytëzimin e fleksibilitetit të parashikuar nga klauzola e shpëtimit për të financuar masa të përkohshme dhe të targetuara në mbështetje të qytetarëve. Athina ka propozuar gjithashtu një takim të përbashkët të ministrave të Energjisë me homologët e tyre të Financave dhe Ekonomisë, në kuadër të ECOFIN dhe Eurogrupit, për të shqyrtuar mënyrat e përballimit të krizës pa cenuar rregullat fiskale evropiane. Nisma është mbështetur nga Malta, Bullgaria, Sllovakia dhe Rumania.
Ndërkohë, Komisioneri Evropian Dan Jorgensen theksoi se problemi nuk lidhet vetëm me sasinë e energjisë në dispozicion, por edhe me pamundësinë e familjeve për të përballuar faturat. “Nëse nuk mund ta paguash faturën e gazit, nuk ka rëndësi se sa gaz është në dispozicion”, u shpreh ai, duke lidhur rritjen e çmimeve të gazit natyror dhe produkteve të naftës me krizën në Lindjen e Mesme. Pavarësisht paralajmërimeve, Komisioni Evropian nuk ka prezantuar ende një paketë të përbashkët masash konkrete për mbrojtjen e familjeve nga shtrenjtimi i energjisë dhe karburanteve.
Jorgensen ka mbështetur ndërkohë uljen e taksave mbi energjinë elektrike, duke argumentuar se kjo do të ndihmonte drejtpërdrejt konsumatorët dhe do të nxiste kalimin drejt energjisë elektrike. Sipas tij, në disa vende anëtare, taksimi mbi energjinë elektrike është deri në katër herë më i lartë se ai mbi gazin natyror. Paralajmërimi i Brukselit vjen në një moment kur familjet evropiane përballen me pasiguri të shtuar për kostot e ngrohjes, ndërsa çmimet e larta rrezikojnë ta bëjnë dimrin e ardhshëm edhe më të vështirë për miliona qytetarë.
