Në këto momente kemi ciklonin e shtresave të larta atmosferike të përqëndruar mbi Evropen Lindore. Rrebeshe të fuqishme shiu ka në këto çaste në Bullgari dhe Rumani, ndërsa ky ciklon do të ndikojë mbi Gadishullin Ballkanik edhe disa ditë.
Këto reshje gjatë natës së sontme dhe ditës së nesërme do të përfshijnë edhe pjesë të mëdha të Serbisë dhe Bosnjë dhe Hercegovinës. Në Bosnjë dhe Hercegovinë dhe Serbi pritet një valë e re reshjesh të dendura shiu, ndërsa lokalisht do të ketë edhe rrebeshe të fuqishme shiu me vetëtima dhe bubullimë. Pra, nga Bullgaria dhe Rumania, përmes Serbisë e në drejtim të Bosnës dhe Hercegovinës këto reshje nesër nuk pritet të prekin Kosovën. Në kosovë priten vetëm riga lokale dhe kryesisht të dobëta me ndonjë përjashtim. Reshje më intensive në Kosovë siç theksuam edhe më herët priten të dielen po nga i njëjti sistem.
Derisa ne presim reshjet e së dielës Bosna dhe Hercegovina dhe Serbia do të përfshihen nga reshje të dendura shiu dhe këto reshje do të prekin edhe rajonet ku kohëve të fundit kishte reshje të mëdha dhe vërshime, megjithatë përkundër reshjeve nuk priten vërshime të përmasave të mëdha./Meteoballkan
