Edhe sot Kosova do të jetë nën ndikimin e masave ajrore shumë të nxehta nga Afrika Veriore. Do të jetë shumë nxehtë, kurse pasdite priten zhvillime lokale të vranësirave të cilat do të sjellin rrebeshe lokalisht të fuqishme shiu me vetëtima dhe bubullimë. Për shkak të temperaturave të larta dhe zhvillimit vertikal të vranësirave mund të paraqitet edhe breshëri. Në rajonet ku do të ketë rrebeshe pritet freskim i motit.
Në tërë rajonin edhe sot shumë nxehtë, kurse pasdite në Maqedoninë e Veriut dhe Mal të Zi priten zhvillime të fuqishme lokale të vranësirave të cilat do të sjellin rrebeshe të fuqishme shiu me vetëtima, bubullimë dhe mundësi edhe për breshër. Bregdeti i Malit të Zi do të mbetet kryesisht pa reshje dhe i nxehtë.
Në Shqipëri edhe sot mot shumë i nxehtë dhe me diell, ndërsa pasdite vetëm në veri, verilindje, lindje dhe juglindje mund të ketë rrebeshe lokale shiu me vetëtima, bubullimë dhe mundësi edhe për breshër.
Të hënën pritet destabilizim i fuqishëm i motit, ku gjatë pasditës dhe mbrëmjes në Kosovë priten rrebeshe të fuqishme lokale shiu me vetëtima, bubullimë dhe mundësi edhe për breshër. Mot jo stabil me rrebeshe shiu pasdite me vetëtima dhe bubullimë pritet edhe në Shqipëri, Maqedoninë e Veriut dhe Mal të Zi. Perëndimi i Shqipërisë dhe bregdeti sipas imazheve satelitore do të mbeten pa reshje, me diell dhe nxehtë.
Edhe ditëve të ardhshme do të vazhdojë të mbajë mot jostabil, pasditeve priten zhvillime lokale të vranësirave të cilat do të kushtëzojnë rrebeshe shiu vende-vende. Bregdeti dhe perëndimi i Shqipërisë nuk pritet të preket nga shiu./Meteoballkan
