Në këto çaste tek po raportojmë fronti i ftohtë ajror ka arritur deri në Serbinë qendore, ku pak më herët Beogradi përsëri u përfshi nga rrebeshe të fuqishme shiu me vetëtima dhe bubullimë, ndërsa disa sisteme të izoluara por të fuqishme stuhish janë zhvilluar mbi Kroaci dhe tani do të përfshijnë edhe Bosnjën. Këto sisteme po përparojnë në drejtim të Kosovës, megjithatë sipas modeleve deri sa të arrijnë tek ne do të dobësohen dukshëm. Pra gjykuar sipas modeleve kompjuterike këto sisteme nuk pritet të përfshijnë Kosovën me reshje atmosferike, përpos disa rajoneve ku priten rrebeshe të izoluara shiu me vetëtima dhe bubullimë nesër në mëngjes. Në Kosovë priten vranësira por jo reshje, por duam të theksojmë edhe një fakt. Në këto raste nuk duhet përjashtuar mundësinë që të befasohemi, prandaj kur të vije ajri i ftohtë, në kontakt me ajrin e nxehtë mund të ndodhë ndonjë befasi të cilën modelet nuk mund ta parashikojnë.
Sidoqoftë ne na mbetet vetëm të presim dhe të shohim si po reagon natyra. Përpara frontit kemi temperatura të larta, kurse pas frontit do të depërtojnë temperatura të freskëta. Shpejtësia e erës nesër gjatë ditës në Kosovë pritet të arrijë deri rreth 50 km/h në nivel vendi./Meteoballkan
