Korriku do të fillojë ashtu siç i ka hije muajit më të nxehtë të vitit, me mot të nxehtë, të kthjellët dhe me shumë rreze diellore. Temperaturat do të shënojnë ngritje të theksuar si pasojë e depërtimit të masës së nxehtë ajrore nga Evropa e cila me origjinë është nga Afrika Veriore. Nesër temperaturat maksimale në Kosovë pritet të arrijnë rreth 33-34-35 gradë celsius.
Edhe në rajon nesër mot stabil, i nxehtë dhe me diell. Pra si në Shqipëri, poashtu edhe në Maqedoninë e veriut dhe Mal të Zi nesër pritet mot tërësisht stabil.
Pasnesër në tërë rajonin do të vazhdojë moti stabil dhe pa të reshura atmosferike. Priten ngritje të mëtutjeshme të temperaturave. Pritet kulminacioni i valës së shkurtë, të nxehtë tropikale. Temperaturat do të arrijnë deri në 36-37-38 gradë celsius.
Të mërkurën në Kosovë pritet mot mjaft i nxehtë, por më i freskët krahasuar me ditën paraprake. Pasdite, vende-vende priten zhvillime të fuqishme të vranësirave konvektive të cilat do të kushtëzojnë rrebeshe lokalisht të fuqishme shiu me vetëtima, bubullimë dhe mundësi edhe për breshër. Rrebeshe lokale shiu priten edhe në veri të Maqedonisë së veriut dhe Mal të Zi. Shqipëria do të mbetet kryesisht pa reshje me ndonjë përjashtim të vogël.
Edhe të enjtën dhe të premtën në Kosovë, Mal të Zi dhe Maqedoninë e veriut pas motit me diell dhe të nxehtë gjatë ditës, pasditeve dhe mbrëmjeve priten rrebeshe lokale shiu me vetëtima dhe bubullimë. Reshjet nuk do të jenë gjithëpërfshirëse. Temperaturat do të shënojnë ulje graduale, pra përpos ditës së nesërme dhe sidomos të martën, ditëve të tjera nuk pritet nxehtësi esktreme por kryesisht normale./Meteoballkan
