Sistemet frontale me origjinë nga Atlantiku po depërtojnë në Evropë duke përparuar gradualisht në drejtim të jugut dhe lindjes. Janë pikërisht këto sisteme që e kanë shtyrë të nxehtit afrikan nga Evropa në drejtim tonin. Në ato rajone ku takohen masat e nxehta me origjinë nga Afrika dhe masat e freskëta nga Atlantiku krijohen kushte për zhvillimin e stuhive të fuqishme të cilat kushtëzojnë shtrëngata me breshër.
Gjatë ditës së sotme ky rajon do të shtrihet që nga Italia veriore, pjesë të Spanjës dhe Francës përsëri, pastaj jugu i skajshëm i Gjermanisë. Më së ashpëri do të jetë në Austri dhe Slloveni, ndërsa fronti do të shtrihet edhe në Ukrainë e deri në Rusi.
Rrebeshe të fuqishme shiu me vetëtima, bubullimë dhe breshër priten sot në Austri dhe Slloveni. Gjatë orëve të vona të pasdites ndonjë “copëz” e këtyre masave ajrore jostabile mund të depërtojë edhe në disa pjesë të Kroacisë, Bosnjë dhe Hercegovinës, Malit të Zi dhe Serbisë, duke shkaktuar destabilizim të atmosferës por në hapësira shumë të ngushta gjeografike. Nesër pasdite stuhi afatshkurtëra dhe të izoluara priten edhe në Kosovë./Meteoballkan
