Edhe sot pjesa më e madhe e territorit të Republikës së Kosovës kalojë pa reshje atmosferike, por në disa rajone pati rrebeshe shiu. Në anën tjetër në pjesët veriore dhe veriperëndimore të Ballkanit po depërton fronti më i ri i ftohtë ajror i cili po kushtëzon rrebeshe shiu me vetëtima dhe bubullimë.
Rrebeshet e sotme janë më të dobëta në krahasim me ditën e djeshme. Ky front i ftohtë ajror do të kushtëzojë edhe krijimin e një cikloni në Detin Adriatik i cili të mërkurën do të na sjellë reshje të dendura shiu, vende-vende edhe rrebeshe të fuqishme shiu me vetëtima dhe bubullimë.
Në këto çaste rrebeshet më të fuqishme janë në verilindjen e Italisë, pastaj në Slloveni dhe Kroaci. Rrebeshe të fuqishme por të izoluara shiu ka edhe në Bosnjë dhe Mal të Zi dhe gjatë natës do të përfshijnë përsëri Serbinë. Pasiqë atmosfera nuk është tërësisht stabile nuk përjashtohet mundësia që edhe në Kosovë dhe Shqipërinë veriore të ketë rrebeshe të izoluara shiu me vetëtima dhe bubullimë.
Frontet jostabile ajrore do të fuqizohen nga dita e nesërme edhe në Kosovë, Mal të Zi si dhe pjesë të Shqipërisë dhe Maqedonisë së veriut, për të arritur kulminacionin të mërkurën kur do të kemi edhe depërtimin e vorbullës ciklonike e cila do të na sjellë reshje të dendura shiu dhe vende-vende edhe rrebeshe të fuqishme shiu me vetëtima dhe bubullimë./Meteoballkan
