Sipas të dhënave zyrtare të Organizatës Botërore Meteorologjike temperatura absolute më e lartë e regjistruar në Evropë është 48.0 ° C (periudha nga 1956 deri më sot). Kjo temperaturë u mat në 10 korrik 1977 në Athinë, Greqi. Temperatura e mësipërme u mat atë ditë në stacionin meteorologjik të Elefsinës, 18 kilometra nga Athina.
Ekzistojnë të dhëna jozyrtare për temperaturën prej 48.5 ° C të matur në Catenanova (Itali) më 10 gusht 1999.
Ky rekord i temperaturës mund të “rrezikohet” në fundjavën e parë të gushtit të këtij viti. Gjegjësisht, në Evropën Jugperëndimore, veçanërisht në Portugali dhe Spanjë, një valë e nxehtësisë është intensifikuar. Modelet kanë njoftuar se temperaturat në jug të Portugalisë dhe në jugperëndim të Spanjës mund të rriten deri në 47 ose 48 ° C.
Modeli GFS ka parashikuar se edhe në Portugalinë jugore mund të matet temperatura mbi 50 ° C, por në dy ditët e fundit kjo prognozë është “zbutur”. Pika e valës termike pritet gjatë të shtunës.
Është shumë e mundshme që në Portugali dhe Spanjë të regjistrohen temperatura që do të thyejnë çdo rekord. Rekordi absolut për Portugalinë është 47.4 ° C. Kjo temperaturë u mat më 1 gusht 2003 në qytetin Amarele në kulmin e një vale të njohur termale që preku pjesën më të madhe të Evropës.
Ndërkohë rekordi i temperaturës për Spanjën është 47.3 ° C dhe u vendos më 13 korrik 2017 në Montoro.
Vala e nxehtësisë u intensifikua gjatë javës së parë të gushtit në Evropën jugperëndimore, perëndimore dhe atë qendrore.
Në ditën e dytë të gushtit, temperatura në Montory të Spanjës shënoi 45.0 ° C. Në Portugalinë qendrore dhe jugore, temperaturat në shumë stacione meteorologjike janë regjistruar mbi 40 ° C. Qyteti Alvega shënoi temperaturën më të lartë prej 44.6 ° C. /MeteoBallkan
