Cikloni më i ri i vendosur diku larg afër jugut të Italisë do të sjellë reshje të reja shiu në viset dhe gati të gjitha territoret tona. Këto reshje do të fillojnë të enjten orëve të hershme dhe pritet së pari të fillojnë në Shqipëri, për tu përhapur pastaj edhe në Kosovë dhe perëndim të Maqedonisë së Veriut.
Për arsye të mungesës së ajrit të mjaftueshëm të ftohtë reshje prapë do të jenë kryesisht në formë shiu, por mund të përzihen me shqotë dhe borë në disa vise por jo në zonat më të ulëta. Në viset kodrinore e sidomos në ato malore do të ketë reshje të reja bore.
Mesdheu (sidomos rajoni i Italisë) është mjaft aktiv me masa ajrore ciklonike që vijnë nga Atlantiku verior, prandaj reshjet e shiut herë pas here mund të zgjasin edhe të Premten dhe të Shtunën. Të shtunën pritet përmirësim i shkurtër i motit.
Reshjet e reja të shiut dhe borës në zonat malore vijnë pak ditë pas reshjeve mjaft intensive të ditëve të kaluara dhe përsëri nganjëherë lokalisht mund të ketë reshje më intensive, por jo në gjithë territorin.
Përderisa kemi depërtime masive të masave ciklonike në Itali dhe Ballkan territoret tona do të gjenden në sektorin e nxehtë të masave ciklonike, ndërsa në Evropë pritet të kemi depërtimin e masave të ftohta Arktike që do të kushtëzojnë reshje të dendura bore edhe në shumë ultësira të Evropes. Këto reshje bore mund të arrijnë deri në Slloveni dhe Bosnjë dhe Hercegovinë, por sipas ecurive aktuale sinoptike ato nuk do të arrijnë në viset tona, prandaj shumica e reshjeve në viset tona do të jetë në formë shiu, përpos viseve malore ku mund të ketë reshje masive bore.
Reshjet atmosferike do të zgjasin shumë ditë, normalisht jo pa ndërprerje dhe do të ishte interesante të kemi edhe ndonjë fluks të ajrit të ftohtë me reshje bore, por kjo mbetet vetëm të shihet, ngase për momentin në viset tona do të dominojnë rrymimet ajrore më të ngrohta që do të pengojnë shndërrimin e shiut në borë. Ndryshime mund të ketë dhe mbetet të shihet./MeteoBallkan
