Sonte gjatë natës në Kosovë do të kemi depërtimin e një fronti të dobët të ftohtë ajror nga veriu. Fronti nuk do të jetë i pasur me lagështi, prandaj po e quajmë si “front të dobët”. Gjatë natës si pasojë e kërij fronti do të kemi fuqizim të erërave veriore dhe shtim të vranësirave dhe tek aty-këtu ndonjë reshje sporadike shiu ose bore. Shpejtësia e erërave do të luhatet nga 30 deri në 40km/h, varësisht nga rajoni në rajon.
Temperaturat do të shënojnë ulje nesër në vlerat maksimale krahasuar me ditën e sotme.
Fronti i dobët do të përhapet në tërë rajonin gradualisht, por në shumë vise të Shqipërisë dhe Maqedonisë së Veriut do të ndjehet fare pak.
Gjatë fundjavës në tërë rajonin na pret mot me vranësira dhe intervale të shkurtra kohore me diell. Vende-vende, herë pas here mund të ketë edhe riga lokale shiu ose fjolla bore në viset pak më larta mbidetare. Reshje shiu parashihen sidomos të dielën, por nuk priten reshje të mëdha dhe reshjet nuk do të zgjasin shumë. Temperaturat ditore do të shënojnë ulje të lehta, kurse me fillimin e javës së re ato do të shënojnë rritje të sërishme të lehta./MeteoBallkan