Fronti i ftohtë nga veriperëndimi është duke u afruar dhe para tij kemi rritje intensive të temperaturave siç mundemi me pa në këto çaste, ndërsa fronti arrin më vonë në mbrëmje duke kushtëzuar zhvillime të fuqishme vranësirash duke përfshirë edhe ato konvektive, ulje të temperaturave dhe reshje lokale shiu si dhe rrebeshe lokale me vetëtima dhe bubullimë.
Nëpër majet më të larta të maleve tona do të ketë kushte për fjollat e para të borës.
Shiu do të fillojë në Mal të Zi, për tu përhapur në Shqipëri dhe Kosovë. Lokalisht priten reshje të dendura shiu dhe rrebeshe intensive, por megjithatë reshjet e shiut nuk do të zgjasin shumë dhe nuk do të përfshijnë tërë territoret tona në mënyrë të baraspeshuar. Më së paku reshje shiu parashihen në veri të Republikës së Kosovës.
Pas një periudhe shumë të gjatë me mot krejtësisht të thatë dhe stabil sonte vijnë reshje kalimtare dhe do të pasojë ulja e temperaturave. Të hënën reshjet do të pushojnë dhe moti do të stabilizohet, por do të jetë dukshëm më freskët ose më ftohtë, ndërsa të martën kemi një tjetrë sistem frontal që vjen nga Italia, me reshje e rrebeshe shiu. Reshje intensive priten në disa vise të Shqipërisë dhe Maqedonisë së Veriut, ndërsa më paku reshje priten në veri të Kosoves. Temperaturat shënojnë ulje të mëtutjeshme.
Pas frontit të së martes pason përmirësimi i motit dhe rritja e temperaturave./METEOBALLKAN
