Një ciklon i fuqishëm sonte pritet të godasë jugun e Britanisë së Madhe, shtetet e Beneluksit dhe gjatë të mërkurës edhe shumë pjesë të Gjermanisë kur priten kryesisht reshje e rrebeshe të dendura shiu dhe më rrallë reshje bore dhe atë më shumë në viset më të larta malore.
Ky ciklon gjatë dy ditëve të ardhshme do të përfshijë edhe shumë pjesë të Gjermanisë dhe jugun e Skandinavisë, me reshje kryesisht shiu. Pastaj, pritet të rrugëtojë drejt Polonisë dhe Rusisë, ndërkohë që në Alpe do të depërtojë fronti i ftohtë në kuadër të këtij cikloni.
Fronti i ftohtë ajror do të rrugëtojë nga Alpet evropiane drejt Ballkanit direkt me reshje shiu, lokalisht edhe bore gjetë të Enjtes dhe sidomos të Premten kur do të kemi krijimin e një cikloni sekondar diku në jug të Adriatikut apo në Detin Jon. Si pasojë të premten do të fillojnë reshje shiu edhe në viset tona e në viset kodrinore malore reshje bore. Ka gjasa që reshje bore të ketë edhe në disa zona më të ulëta mbidetare, ndërsa për viset më të ulëta nuk mund të thuhet asgjë.
Cikloni më i ri që do të krijohet në Detin Jon do të tërheq ajrin e ftohtë nga veriu në drejtim të viseve tona dhe gjatë fundjavës priten vranësira të shpeshta, reshje të shpeshta lokale në formë shiu e bore varësisht nga sasia e ajrit të ftohtë.
Situata ende mbetet e paqartë shkaku i sasisë eventuale të ajrit të ftohtë që pritet të arrijë. Gjithsesi, presim reshje të shpeshta shiu e bore në viset kodrinore-malore, ndërsa për zonat më të ulëta situata mbetet ende enigmatike.
Deri të Premten mbesin edhe dy ditë kryesisht stabile, megjithatë vende-vende edhe të enjten do të kemi reshje atmosferike sidomos në disa vise të Shqipërisë dhe Malit të Zi.
Të Premten reshje në gati të gjitha viset dhe për sasinë dhe llojin e reshjeve do të njoftoheni në postimet tona të reja. Nuk pritet ndonjë ekstrem, megjithatë situata mbetet jashtëzakonisht interesante dhe meriton vëmendje dha analiza të mëtutjeshme./MeteoBallkan
