Nata e së mërkurës dhe agimi i ditës së enjte do të jetë kulminacioni i meteorëve Perseid për këtë vit sipas Nasa-s. Gjatë kësaj periudhe nëse jemi me fat dhe zgjedhim një vend të përshtatshëm mund të shohim nga 100 deri në 150 meteorë të ndritshëm për një orë që përshkojnë qiellin e errët të favorshëm pa rrezet e hënës.
Ky vit është i veçantë ngase nuk kemi pengesën e dritës së hënën e cila pothuajse çdo vit është pengesë e madhe për të shikuar sa më shumë meteoritë dhe për këtë arrsye astronomët theksojnë se ky mund të jetë spektakli më i mirë për dekada të tëra.
Meteorët nuk mund të shihen mirë kur kemi drita urbane ose çfarëdo dritash tjera , ndërsa vranësirat dhe hëna mund të jenë pengesa kryesore, sidoqoftë natën mes së mërkurës dhe të enjtën në territoret tona na pret mot kryesisht i kthjellët dhe pa rrezet e hënës ngase ajo pritet të perëndojë në një kohë mjaft të përshtatshme.
Për të parë sa më shumë meteor zgjidhni ndonjë vend rural dhe sa më larg dritave, relaksohuni dhe përjetoni magjinë. Kjo vlenë normalisht për entuziastët e ngjarjeve të tilla astronomike.
Çdo vit nga 17 Korriku deri në 24 Gusht planeti ynë përshkon orbitën e Kometes Swift Tuttle. Mbetjet e kometes përplasen me atmosferën e tokës me shpejtësi deri në 210 000 km. në orë duke na dhuruar pamje spektakulare të “fisheshekzjarreve” në qiellin e hapur të natës së nxehtë të muajit Gusht.
Meteorët e mrekullueshëm mund të shihen gati çdo natë deri pas 20 Gushtit, por kulminacioni e tyre është mbrëmjen e vonshme të së mërkurës dhe agimin e së enjtës. Meteorë spektakularë mund të shohim edhe sonte dhe po ashtu edhe të premtën, pastaj dendësia e tyre vjen duke u zbehur./Meteoballkan
