Në Mesdhe kemi një ciklon të cekët por të mjaftueshëm për destabilizim të fuqishëm të atmosferës. Njëkohësisht edhe në Adriatikun verior kemi krijimin e një qendre të re ciklonike e cila do të rrugëtojë drejtë jugut të Adriatikut dhe Shqipërisë ku do të arrijë nesër. Në anën tjetër nga veriu i kontinentit kemi depërtimin e frontit më të ri të ftohtë ajror dhe kombinimi i të gjithë këtyre fatkorëve do të na sjellë reshje të dendura atmosferike.
Reshjet do të fillojnë sot pasdite në formë të rrebeshe të fuqishme lokale me vetëtima dhe bubullimë, dhe do të vazhdojnë herë pas here dhe vende-vende edhe gjatë natës, ndërsa nesër në tërë rajonin priten reshje të dendura shiu (jo pandërpre), ulje e theksuar e temperaturave, kurse lokalisht do të ketë edhe stuhi apo shtrëngata të fuqishme me bubullimë dhe mundësi edhe për breshër. Pas uljes së theksuar të temperaturave në Kosovë priten reshje të zakonshme, vende-vende të dendura shiu të cilat do të ndërpriten nesër në mbrëmje apo gjatë natës.
Pasnesër stabilizim i motit, kurse për fundjavë priten reshje të reja të dendura shiu./Meteoballkan
