Është jashtëzakonisht e rrallë që në Shtetet e Bashkuara të Amerikës të ketë alarm për stuhi dëbore/akulli dhe uragan njëkohësisht.
Një stuhi akulli e përmasave katastrofike ka përfshirë sot pjesën veriperëndimore të Teksasit dhe pjesën perëndimore-qendrore të Oklahomës në Shtetet e Bashkuara të Amerikës. Në anën tjetër në Gjirin e Meksikës kemi uraganin Zeta i cili pasi goditi pjesë të Meksikës po ristrukturohet në ujërat e ngrohta të Gjirit duke u intensifikuar dhe fuqizuar përsëri dhe pritet të godas Luizianën, Misisipin e shtete tjera në jug dhe juglindje të Amerikës. Pra, kaq afër në Amerikë gjenden dy sisteme krejtësisht të kundërta të motit. Ajri i fuqishëm Arktik me minuse të thella i cili ka arritur deri në veriperëndim të Teksasit dhe Ajri Tropikal i cili gjendet në Gjirin e Meksikës dhe jug të Shteteve të Bashkuara të Amerikës. Goditja e fuqishme arktike ka shkaktuar reshje të dendura bore dhe stuhi akulli apo shiut të ngrirë të përmasave katastrofike, ndërsa uragani Zeta pritet të shkaktojë reshje të fuqishme shiu tropikal në jug dhe juglindje të Amerikës. Ekstremet e motit në Shtetet e Bashkuara të Amerikës vazhdojnë të na fascinojnë pa kufi.
