Gjendja aktuale sinoptike favorizon destabilizim e atmosferës në Gadishullin Ballkanik e më vonë edhe në territoret tona.
Një masë ajrore mjaft e paqëndrueshme gjendet në Mesdhe duke rrugëtuar në drejtim të juglindjes. Si pasojë ka filluar grumbullimi i vranësirave të dendura në Itali dhe njëkohësisht në Rumani dhe Bullgari kanë filluar zhvillimet masive konvektive dhe ka stuhi të fuqishme lokale me vetëtima dhe bubullimë. Zhvillime të izoluara tani ka edhe në juglindje të Shqipërisë, Serbi, Bosnjë dhe Hercegovinë, Kroaci dhe Slloveni, ndërsa më vonë gjatë pasdites ose mbrëmjes rrebeshe të izoluara pritet të përfshijnë edhe Kosovën dhe Maqedoninë e Veriut, vende-vende mjaft intensive. Sipas disa parametrave të disa modeleve sonte rrebeshet më të fuqishme parashihen në lindje-verilindje dhe sidomos në juglindje të Kosovës, pastaj në shumë pjesë të Maqedonisë së Veriut, ndërsa e Enjta sjellë destabilizime të furishme në Shqipëri, Maqedoninë Veriore dhe pjesë të Republikës së Kosovës.
Megjithatë, rrebeshet e fuqishme lokale mund të ndodhin në çdo pjesë të territorit dhe kjo varet nga ecurisa dhe vendi ku zhvillohet një stuhi e izoluar. Është jashtëzakonisht e vështirë të përcaktohet saktë lokacioni i tyre.
Pra, pas një dite të ngrohtë, pasdite vonë dhe në mbrëmje presim destabilizim të fuqishëm të atmosferës. Rrebeshet fillimisht nuk do të kapin tërë territorin, por do të jenë të lokalizuara. Vende-vende do të ketë gjasa për ndonjë shtrëngatë të fuqishme kalimtare, ndërsa duke përfshirë edhe zhvillimet dhe reshjet e fuqishme lokale të ditës së Enjte mund të kemi vërshime të shpejta në disa lokacione.
Nga e Premtja energjia kryesore e rrebesheve të fuqishme të pasdites zhvendoset në pjesën më të madhe të Shqipërisë e sidomos në “aksin ajror” jug-qendër, kurse për fundjavë na pret mot i qetë edhe pse me mundësi për reshje afatshkurtra lokale./MeteoBallkan
