Reshje të dendura bore kanë filluar sot në shumë pjesë të Kontinentit Evropian për shkak të depërtimit të masave të fuqishme ajrore ciklonike nga Atlantiku dhe kontaktit të tyre me ajrin e ftohtë polar. Evropa, por edhe rajoni ynë po e vuajnë mungesën e madhe të reshjeve të borës shumë dimra të fundit, por kjo do të ndryshojë të paktën për disa pjesë të Evropës ditëve të ardhshme ku priten reshje të dendura atmosferike duke përfshirë edhe borë nëpër shumë ultësira.
Normalisht nuk pritet borë në tërë Evropën sepse një pritshmëri e tillë do të ishte absurde.
Reshje të dendura bore priten Zvicër, Gjermaninë jugore dhe perëndimore, Francën juglindore, viset kodrinore-malore të Gadishullit Iberik dhe Ishujve Britanik (duke përfshirë edhe disa ultësira), pastaj në Austrinë jugperëndimore, Italinë veriore, Slloveni, pjesë të Kroacisë, Bosnjës dhe deri në malet e larta të Malit të Zi dhe veriut të skajshëm të Shqipërisë. Ciklonet e fuqishme nga Atlantiku do të ndikojnë në masë të madhe në motin gjatë ditëve të ardhshme në Evropë dhe tek ne, por për shkak të pozitës dhe vendndodhjes së ciklonit në drejtim të rajonit tonë do të rrymojnë rryma të ngrohta ajrore, ndërsa në drejtim të Evropës rryma të ftohta ajrore, edhe pse i ftohti nuk pritet të jetë shumë i fortë, por do të mjaftojë për të shkaktuar reshje të fuqishme atmosferike duke përfshirë edhe të borës vende-vende dhe herë pas here. E kemi fjalën për shtetet e përmendura më lartë.
Në Alpet evropiane reshjet e borës ditëve të ardhshme do të jenë masive, të fuqishme dhe intensive si dhe do të zgjasin me ditë të tëra, me ndërprerje të rralla. Kështu që bora priten të arrijë lartësinë deri në 3 metra./Meteoballkan
