Zhvillime interesante meteorologjike kemi këto ditë në Hemisferën Veriore. Në Shtetet e Bashkuara të Amerikës kemi zbarkimin e masës së fuqishme ajrore polare. Pothujase gjysma e ajrit të Rrethit Polar është zhvendosur në Amerikë dhe Kanada. Në anën tjetër kemi depërtimin e masave të ftohta polare edhe në drejtim të Britanisë së Madhe ku shumë pjesë të Londrës mbrëmë u përfshinë nga reshje të dendura shqote dhe bore.
Reshje të dendura shiu, shqote dhe bore pati edhe në Kosovë gjatë natës që lamë pas. Mot i ndryshueshëm do të vazhdojë edhe ditëve të ardhshme. Në Amerikë sot dhe nesër kemi kulminacionin e goditjes rekorde polare, kurse në Britani gjithashtu do të kemi reshje të reja të dendura bore. Në Ballkan priten reshje të reja shiu dhe bore. Reshje të dendura shiu do të përfshijnë Shqipërinë kurse reshje më të pakta shiu dhe bore apo shqote priten në Kosovë dhe Maqedoni.
Në fillim të Shkurtit pritet ngritje e temperaturave dhe fuqizim i erërave të nxehta jugora.
